Жиззах вилоятида ноқонуний тарзда тупроқ қазиб олган фуқаролар жавобгарликка тортилди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги хабар қилди.

Қайд этилишича, Экология, атроф-муҳитни муҳофаза қилиш ва иқлим ўзгариши бошқармаси томонидан навбатдаги рейд тадбирлари ўтказилди.

Натижада, Ғаллаорол тумани ҳудудида фуқаро О.С. ўзи бошқарувида бўлган юкловчи транспорт воситаси ёрдамида «Қашқабулоқ» МФЙ «Қорақўйли» қишлоғининг туман захира ер майдони ҳудудидан ноқонуний равишда тупроқ қазиб ортиб кетаётганлиги аниқланди.

Бу ҳолат бўйича фуқарога нисбатан МЖтКнинг 70-моддаси 1-қисми билан маъмурий баённома расмийлаштирилиб, базавий ҳисоблаш миқдорининг 11 баравари — 4 миллион 125 минг сўм миқдорида жарима қўлланилди. Шунингдек, табиатга 2 миллион 450 минг сўм миқдорида зарар етказилганлиги ҳисобланди. Ҳуқуқбузар жами 6 миллион 575 минг сўм тўлайдиган бўлди.

Бошқа бир ҳолатда эса «Қашқабулоқ» МФЙ ҳудудида фуқаро А.Ш. ноқонуний равишда тупроқ қазиб олиб, ортиб кетаётган вақтида тўхтатилди. Унга нисбатан МЖтКнинг 70-моддаси 1-қисми билан маъмурий баённома расмийлаштирилиб, БҲМнинг ўн бир баравари — 4 миллион 125 минг сўм жарима қўлланилди.

Аввалроқ фуқаро машинасининг олд капотига ҳимоя плёнкасини ёпиштириб, ичига сув ва балиқлар солиб ҳаракатлангани акс этган видеолар юзасидан Экология вазирлиги муносабат билдиргани ҳақида хабар қилгандик.