Абдулазиз ЙЎЛДОШEВ/«Халқ сўзи». Ургут туманининг Сариқтепа массивида қурилаётган янги подстанция нафақат «Ургут» эркин иқтисодий зонаси ҳудудидаги ишлаб чиқариш корхоналарини, балки туман аҳолисини ҳам узлуксиз электр энергияси билан таъминлашга хизмат қилади. Лойиҳанинг умумий қиймати 25,5 миллион АҚШ долларини ташкил этиб, «Ўзбекистон миллий электр тармоқлари» акциядорлик жамияти ва Молия вазирлиги билан ҳамкорликда молиялаштирилмоқда.

Ушбу лойиҳа ва унга боғлиқ электр тармоқлари орқали «Ургут» ЭИЗнинг «Мерганча» ва «Сариқтепа» массивларида жойлашган ишлаб чиқариш корхоналарига узлуксиз электр энергияси етказиб берилади.

— Ургут туманидаги юқори кучланишли электр узатиш тармоқлари ёрдамида Жомбой туманидаги «Назар» массивида қурилаётган 2 та 25 МВтли подстанцияларни ҳам электр энергияси билан таъминлаш имконияти яратилади, — дейди Самарқанд миллий электр тармоқлари корхонасидан бириктирилган масъул ходим Қобилжон Эшқулов. — Натижада ҳудуддаги 139 та йирик ишлаб чиқариш корхоналари электр энергияси билан таъминланади, бу эса 5 656,6 миллиард сўмлик маҳсулот ишлаб чиқариш ҳажмини ошириш, 84,8 миллион АҚШ долларилик маҳсулот экспорт қилиш ва 9 586 янги иш ўринларини яратиш имконини беради.

Мазкур лойиҳа «Ургут» эркин иқтисодий зонаси инфратузилмасини янада такомиллаштириш ва ҳудуддаги саноат ишлаб чиқариш жараёнларини барқарор ривожлантиришга қаратилган. Шунингдек, энергетика тизимидаги ислоҳотлар доирасида аҳолини ва тадбиркорлик субъектларини ишончли ва узлуксиз электр энергияси билан таъминлаш мақсадлари йўлидаги муҳим қадам ҳисобланади.