Фото: AP

Шу кунларда Украина ва Венгрия чегарасида жиддий можаро авж олган. Бу ҳақда АҚШ разведкасининг собиқ ходими Скотт Риттер айтиб ўтди.

“Венгрия Украина билан чегарага қўшин киритди. Ҳозирда улар ўртасида дипломатик жанжал бор, ҳар икки томон бир-бирини айғоқчи ячейка ташкил қилганликда айбламоқда. Киев ҳам одам етишмаслиги сабабли Карпат венгерларини фронтга зўрлик билан олиб кета бошлади”, — дейди у.

Таҳлилчининг қўшимча қилишича, эскалация хавфи анча юқори, айниқса, Киевда ҳокимият сусайса.

“Бундан ташқари, агар Украинада тўсатдан сиёсий ноаниқлик даври бошланса, бу минтақа мамлакатни тарк этишга ва Венгрияга қўшилиш бўйича референдум ўтказишга ҳаракат қилишини аллақачон кўриш мумкин. Ўз навбатида, улар бу ҳудудни олишни жуда хоҳлашади”, — дейди Риттер.

Венгрия бош вазири Виктор Орбан 13 май куни жосуслик можароси муносабати билан Мудофаа кенгашини чақириб, уни Украина махсус хизматларининг венгер мухолифати фаол иштирокида Киевнинг Европа Иттифоқига аъзолиги бўйича умумвенгрия овоз бериш жараёнини бузиш мақсадида амалга оширган операцияси деб атади.

Шу йилнинг 9 май куни Украина хавфсизлик хизмати мамлакат тарихида биринчи марта жосуслик фаолияти билан шуғулланаётган венгер ҳарбий разведка тармоғини фош қилганини маълум қилди. 2025 йилда бўлинмадан истеъфога чиққан 40 ёшли собиқ ҳарбий ва Украина Қуролли кучларининг собиқ аёл ҳарбий хизматчиси қўлга олинди.

Ўз навбатида, Венгрия ташқи ишлар вазири Петер Сижарто бунга жавобан Будапештдаги элчихонада дипломатик ниқоб остида ишлаган икки украиналик жосусни чиқариб юбораётганини айтди. Шундан сўнг, Украина акс жавобини эълон қилди. Шу куни Венгрия аксилтеррор маркази ходимлари Украина элчихонасининг собиқ ходимини ҳам пойтахт марказида ушлаб, бир неча соат ичида мамлакатдан чиқариб юборган.