Фото: www.google.com

Бугун, 8 февраль куни Хитойнинг Ухань шаҳрида коронавирусни даволаш бўйича иккинчи ихтисослаштирилган шифохона фойдаланишга топширилди.

Шифокорларнинг биринчи гуруҳи аллақачон етиб келишган ва беморларни қабул қилмоқда. Беморларнинг кўпчилиги режага кўра, 8 февраль куни шу ерга кўчирилди. Эндиликда, вирус аниқлангани тасдиқлаган янги беморлар шу ерга жойлашади.

Уханга яқин мазкур шифохона 79 минг квадрат метр майдонни эгаллаган бўлиб, ҳудуддаги 10 та бино тиббиёт ходимларига ва логистика учун мўлжалланган. Шифокорлар учун 264 та хона ажратилган бўлиб, ҳар бирида учта кароват, кондиционер, телевизор, алоҳида ҳожатхона ва душ мавжуд.

Шифохона 1500 беморга мўлжалланган. Хоналарга 2 тадан бемор жойлашиши мумкин. Аҳволи оғир беморлар учун алоҳида махсус хоналар бор.

Шунингдек, шу ҳафта бошида Хошеншан шифохонаси беморларни қабул қила бошлади, у 10 кун ичида қурилган эди. Иккинчи шифохона 27 январда қурила бошланганди. Дастлаб, уни 5 февраль куни фойдаланишга топшириш кўзланган эди, аммо топшириш муддати бироз чўзилган.

Сўнгги маълумотларга кўра, коронавирус қурбонлари сони 724 нафарга етган. Қурбонларнинг фақатгина икки нафари Хитойдан ташқарида вафот этган.

Дунё бўйича коронавирус билан касалланганлар сони эса 34 878 нафарга етди. Беморларнинг 34 546 нафари Хитойда қайд этилган. Қолганлари дунёнинг 26 давлатида аниқланган.

Коронавирусдан даволанганлар сони 2085 нафарга етди. Беморларнинг 6106 нафарининг аҳволи оғир, деб баҳоланяпти.