Фото: Истанбул Бош консулхонаси

Туркиянинг Ушоқ шаҳрида 2020 йилдан буён тутқунликда сақланаётган 42 ёшли ўзбекистонлик аёл қутқарилди. Бу ҳақда Ўзбекистон Республикасининг Истанбул шаҳридаги Бош консулхонаси хабар бермоқда.

Қайд этилишича, 21 ёшли фуқаро Ташқи ишлар вазирлиги орқали Бош консулхонага онасининг 4 йил олдин Истанбулга кетгани, 3 йилдан бери алоқага чиқмаётганини айтиб, уни топиш ва ватанга қайтаришда ёрдам сўраб мурожаат йўллаган.

Мурожаат бўйича олиб борилган текширишлар натижасида, 1982 йил Қарши шаҳрида туғилган Х.Д. Туркиянинг Ушоқ шаҳрида эканлиги, 2020 йилдан буён Туркия фуқароси М.Г. томонидан эркига хилоф равишда тутқунликда ушлаб турилгани аниқланган.

«Жорий йилнинг 27 август куни Бош консулхона, Ташқи меҳнат миграциясининг Истанбул шаҳридаги вакили, «Ўзбек аёллари ҳуқуқларини ҳимоя қилиш» жамияти ва Туркия Ички ишлар вазирлиги билан ҳамкорликда тезкор тадбир ташкил этилди. Натижада, ватандошимизнинг ҳаётига ва соғлигига зиён етказилмаган ҳолда қутқарилиб Ушоқ шаҳар ички ишлар бошқармасига етказилди», дейилади хабарда.

Қўшимча қилинишича, ҳозирда 42 ёшли Х.Д.ни Ўзбекистонга қайтариш бўйича тегишли ишлар давом эттирилмоқда. Туркия қонунчилигига биноан шахсни эркига хилоф равишда тутқунликда сақлаганлиги учун М.Г.га нисбатан жиноят иши қўзғатилган.

Шунингдек, «ёлғон ва пуч ваъдаларга ишониб эркингизни ва ҳаётингизни хавф остига қўймасликни, шу каби вазиятга тушган тақдирда Анқарадаги Ўзбекистон элчихонаси ёки Истанбулдаги Бош консулхонага мурожаат этишингизни тавсия этамиз», дея эслатган консулхона матбуот хизмати.