АҚШ президенти Дональд Трамп Канада ҳукумати билан олиб борилаётган савдо музокараларини Онтарио провинцияси томонидан эфирга узатилган реклама сабабли тўхтатганини маълум қилди. Мазкур роликда АҚШнинг 40-президенти Рональд Рейганнинг тарифлар (бож тўловлари) ҳақидаги сўзлари келтирилган эди.

— Рональд Рейган жамғармаси ҳозиргина Канада томонидан сохталаштирилган реклама эълон қилинганини билдирди. Унда гўёки Рональд Рейган тарифларга қарши фикр билдираётгандек кўрсатилган. Аслида эса тарифлар АҚШнинг миллий хавфсизлиги ва иқтисодиёти учун жуда муҳимдир. Шу сабабли уларнинг бу очиқчасига носамимий хатти-ҳаракати туфайли Канада билан барча савдо музокаралари тўхтатилди, — деб ёзди Трамп «Truth Social» ижтимоий тармоғида.

Онтарио ҳукумати эълон қилган бир дақиқалик роликда 1987 йилги Рейган нутқидан парчалар келтирилган. Унда:

«Кимдир хорижий импортга бож жорий этишни таклиф қилса, бу ҳаракат дастлаб ватанпарварликдек туюлади ва қисқа муддатда ишлаши мумкин, бироқ узоқ муддатда бундай тўсиқлар ҳар бир америкаликка — ҳам ишчиларга, ҳам истеъмолчиларга — зарар етказади»,
— деган сўзлар ишлатилган.

Рональд Рейган жамғармаси баёнотида таъкидланишича, Онтарио ҳукумати реклама тайёрлашда Рейганнинг 1987 йил 25 апрель кунги «Эркин ва адолатли савдо» мавзусидаги радио чиқишидан фақат айрим қисмларни танлаб олган ҳамда уларни рухсатсиз таҳрир қилган.

— Бу реклама Рейганнинг нутқ мазмунини бузиб кўрсатади. Онтарио ҳукумати бу сўзлардан фойдаланиш ёки уларни таҳрирлаш учун ҳеч қандай рухсат олмаган, — дейилади жамғарма баёнотида.

Маълумот учун, Трамп маъмурияти илгари Канада маҳсулотларининг кўп турига 35 фоиз бож жорий қилган, шунингдек пўлат, алюминий, автомобиллар, ёғоч ва мис учун алоҳида бож тўловларини ҳам белгилаган эди.