Фото: Reuters

АҚШ президенти Дональд Трамп Доҳа (Қатар)га зарбалар бериш ҳақидаги қарор унга эмас, балки Исроил бош вазири Биньямин Нетаньяҳуга тегишли эканини маълум қилди. Бу ҳақда у Truth Social тармоғида ёзди.

«Бу қарорни мен эмас, бош вазир Нетаньяҳу қабул қилди», — деди Трамп.

Унинг сўзларига кўра, Қатарга қарши бир томонлама бомбардимонлар — «суверен давлат ва АҚШнинг яқин иттифоқдоши, тинчлик йўлида катта таваккалчиликка қўл ураётган мамлакат»га нисбатан амалга оширилган ҳаракатлар — Вашингтон ҳамда Исроил манфаатларига хизмат қилмайди.

Трампнинг таъкидлашича, у махсус вакили Стив Уиткоффга Қатарни ҳужум ҳақида «дарҳол» хабардор қилишни топширган, бироқ маълумот кеч етказилгани боис зарбаларнинг олдини олиш имкони бўлмаган.

Президент АҚШнинг асосий мақсадлари сифатида:

— ҲАМАС томонидан ушлаб турилган барча гаровдаги шахсларни озод қилиш,

— ҳалок бўлганларнинг жасадини қайтариш,

— Исроил билан урушни дарҳол тўхтатиш зарурлигини қайд этди.

Трамп шунингдек, Исроил зарбасидан сўнг Нетаньяҳу билан суҳбатлашганини, у эса тинчликка эришиш истагини билдирганини айтди.

«Мен бу фожиа тинчликка эришиш учун имконият бўлиши мумкин, деб ишонаман», — дея таъкидлади АҚШ президенти.

Трамп қўшимча қилиб, Қатар амири ва бош вазири билан ҳам телефон орқали мулоқот қилганини маълум қилди.

«Мен уларга мамлакатимиз билан дўстона муносабатлари учун миннатдорчилик билдирдим ва уларга бундай ҳодиса уларнинг юртида қайта такрорланмаслигини кафолатладим», — деди у.