Тошкентда «закладка» усулида гиёҳвандлик моддаларини тарқатаётган шахслар қўлга олинди. Бу ҳақда ИИВ Матбуот хизмати хабар қилди.

Қайд этилишича, жорий йилнинг 19 июль куни Тошкент шаҳар Учтепа туманида Чилонзор туманидаги тунги клуб қўриқчиси 1997 йилда туғилган шахс тўхтатилиб текширилганда, унинг ёнидан 37 дона ўрамда 26 грамм мифидрон гиёҳвандлик моддаси борлиги аниқланди.

Шунингдек, тадбир давомида ушбу шахс томонидан туманда жойлашган кўпқаватли уйлардан бирининг кириш йўлагига «закладка» усулида яширилган 11 грамм ҳамда унинг бошқарувидаги Lacetti автомашина салонида 3 грамм мифидрон гиёҳвандлик моддаси борлиги аниқланиб, ашёвий далиллар ҳужжатлаштирилиб олинган. Ўтказилган тезкор қидирув тадбирлари натижасида жами 40 грамм мифидрон моддаси олинган.

Шу каби бошқа бир ҳолатда эса жорий йилнинг 21 июль куни Тошкент шаҳар Юнусобод туманида 2004 йилда туғилган фуқаро тўхтатилиб текширилганда унинг ёнидан 30 дона ўрамда 60 грамм гиёҳвандлик моддаси борлиги аниқланиб, ашёвий далил сифатида олинган.

Ҳозирда тезкор қидирув тадбирлари давом эттирилмоқда.

Аввалроқ Тошкент вилоятининг Ўрта Чирчиқ туманида интернет орқали гиёҳвандлик воситаларини сотувчи шахслар билан алоқада бўлиб, «закладчик» сифатида фаолият юритган 3 нафар шахс қўлга олингани тўғрисида хабар қилгандик.