Иллюстратив фото

Тошкент вилоятида жойлашган 3 та вақтинчалик сақлаш ҳибсхоналари фаолияти тугатилди. Бу ҳақда Инсон ҳуқуқлари бўйича омбудсман матбуот хизмати хабар қилди.

Жорий йилнинг июнь ойида Қуйичирчиқ ва Чиноз туманлари ИИБ вақтинча сақлаш ҳибсхоналарига мониторинг ташрифлари ўтказилиб, аниқланган камчиликлар юзасида Ички ишлар вазирлигига Омбудсман тақдимномаси киритилган.

Маълум бўлишича, аниқланган камчиликларни бартараф этиш чора-тадбирлар белгиланиб, Қуйичирчиқ тумани ИИБ вақтинча сақлаш ҳибсхонасига вентиляция тизими ва радиоэшиттириш қурилмаси ўрнатилган. Камералар керакли анжомлар билан жиҳозланиб, сайр қилиш ҳовлиси ва санитария тармоқларида таъмирлаш ишлари олиб борилган.

Шу билан бир қаторда, шахсларни сақлашнинг санитария-гигиена қоидалари талабларига зид бўлган Чиноз, Қибрай ва Юқоричирчиқ туманларидаги вақтинча сақлаш ҳибсхоналари фаолияти ИИВ нинг 2025 йил 21 июлдаги тегишли буйруғи билан тугатилди.

Аввалроқ Қирғизистонда ўндан ортиқ жазо колонияларини тугатиш режалаштирилаётгани тўғрисида хабар қилгандик. Бунда пробация ва манзил-колониялар тизими бир бирини такрорлай бошлагани туфайли айрим колонияларни ёпишга тўғри келган.