АҚШ Толибоннинг юқори мартабали раҳбарларини қўлга олиш учун Усама бин Ладен учун белгилангандан каттароқ мукофот эълон қилиши мумкин, деб хабар бермоқда «Newsweek» нашри.

Маълумотларга кўра, Толибон гаровда ушлаб турган америкаликларнинг сони аввал хабар қилингандан кўпроқ бўлиши мумкин. Агар бу маълумотлар ўз тасдиғини топса АҚШ Толибон раҳбариятини қўлга олиш учун катта миқдордаги мукофот пули беришини эълон қилган.

Таъкидланишича, Толибон ҳукумати 2022 йилнинг август ойида иш сафарида бўлиб турган икки нафар америкаликни ҳибсга олган. Толибон АҚШ билан муносабатларни нормаллаштиришга интилаётган бир вақтда бу каби можаролар салбий оқибатларга олиб келиши мумкин.

«Толибон хабар қилинганидан кўра кўпроқ америкаликларни гаровда ушлаб тургани ҳақида маълумот олдик. Агар бу рост бўлса, биз дарҳол уларнинг юқори раҳбарларини қўлга олиш учун Бин Ладенни ушлаш учун эълон қилган мукофот пулидан ҳам кўпроғини эълон қилишга тайёрмиз», — деб ёзган Рубио ўзининг Х саҳифасида.

Эслатиб ўтамиз, Марко Рубио 21 январь куни 99 нафар сенатор овози билан АҚШ давлат котиби лавозимига тасдиқланган эди.