Бугун, 13 апрель куни АҚШнинг Нью-Жерси штати, Атлантик-Сити шаҳрида профессионал бокс оқшоми бўлиб ўтди. Унда Ўзбекистон вакили Шаҳрам Ғиёсов аргентиналик боксчи Франко Максимилиано Окампога қарши рингга кўтарилди.

Ғиёсов тўқнашувнинг илк сониялариданоқ ринг марказини эгаллаб, рақибига нисбатан босим билан ҳаракат қилди. Ҳатто 1-раунднинг ўзида кетма-кет берилган аниқ зарбалардан бир рақиб боксчини нокдаун ҳолатига туширди. Кейинги раундларда ҳам Шаҳрам яққол устунлик қилди ва 4-раундда Окампо танасига қабул қилиб олган оғир зарбадан сўнг рингга йиқилди.

Қоидага кўра рефери баланд овозда 10 гача санади, бу вақт ичида аргентиналик боксчи ўзига кела олмади ва техник нокаут қайд этилди. Шу тариқа Шаҳрам Ғиёсов профессионал боксдаги 17-ғалабасини тантана қилди.

Ўзбекистонлик спортчи баҳс якунлангач, нутқ сўзлар экан, мазкур ғалабани марҳум қизчасига бағишлаганини ва албатта чемпионлик жангида ҳам ғолиб бўлишини маълум қилди.

«Қизимга чемпион бўламан деб ваъда берганман. У менга ишонган. Мен албатта, буни уддалайман. Бу ғалабамни қизимга бағишлайман!» деди боксчи.

Қайд этиш керак, Ғиёсов ушбу ғалабаси орқали чемпионлик жангини нақд қилди. У кейинги жангини Жерон Эннис ва Эймантас Станионис тўқнашуви ғолибига қарши, камар учун ўтказади.