Фото: Акмал Муҳаммадов / “Халқ сўзи”

Жорий йил 23 июль куни Сенатнинг Мудофаа ва хавфсизлик масалалари қўмитасининг мажлиси бўлиб ўтди.

Унда Сенат аъзолари, Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар Кенгашлари доимий комиссиялари раислари, Қўмита ҳузуридаги экспертлар гуруҳи аъзолари, тегишли вазирлик ва идоралар мутасаддилари ҳамда оммавий ахборот воситалари вакиллари иштирок этди.

Мажлисда Сенатнинг навбатдаги ялпи мажлиси кун тартибига киритилиши режалаштирилаётган масалалар дастлабки тарзда кўриб чиқилди.

Хусусан, “Сейсмик хавфсизликни таъминлаш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиришлар киритиш тўғрисида”ги Қонун муҳокама қилинди.

Таъкидланганидек, мамлакатимизда шаҳарсозлик соҳасини такомиллаштириш ва шаҳарсозлик фаолияти объектларининг сейсмик хавфсизлигини таъминлашда тизимли чора-тадбирлар қабул қилинганига қарамасдан, шаҳарсозликка оид қонунчилик талаблари бузиб келинмоқда.

Жумладан, Қурилиш ва уй-жой коммунал хўжалиги вазирлиги ҳузуридаги Қурилиш ва уй-жой коммунал хўжалиги соҳасида назорат қилиш инспекцияси томонидан 2021 йилда 30,5 мингта, 2022 йилда 32,5 мингта ва 2023 йилда 36,2 мингта объект қурилиши ишлари устидан давлат назорати ўрнатилган.

Мазкур объектларда Маъмурий жавобгарлик тўғрисидаги кодекснинг тегишли моддаси (Шаҳарсозлик тўғрисидаги қонунчиликни бузиш) бўйича 2021 йилда 3,1 минг, 2022 йилда 6,1 минг ва 2023 йилда 7,6 минг нафар ҳуқуқбузарга нисбатан маъмурий жарималар қўлланилган.

Юқоридагилар инобатга олинган ҳолда “Сейсмик хавфсизликни таъминлаш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиришлар киритиш тўғрисида”ги Қонун ишлаб чиқилди.

Қонун билан Ўзбекистон Республикасининг Жиноят, Жиноят-процессуал ва Маъмурий жавобгарлик тўғрисидаги кодекслари ҳамда “Лицензиялаш, рухсат бериш ва хабардор қилиш тартиб-таомиллари тўғрисида”ги Қонунига тегишли ўзгартиришлар киритилмоқда.

Жумладан, Қонун билан Жиноят кодекснинг 2293-моддасига қурилиши тугалланган бинолар ва иншоотлардан фойдаланишга ҳамда уларни фойдаланишга қабул қилиб олиш қоидаларини бузганлик, объектларни қурилиш ва уй-жой коммунал хўжалиги соҳасида назорат қилиш инспекцияларининг рухсатномасиз қуриш, кўп квартирали уйлардаги таянч конструкцияларни қонунчиликни ҳамда техник жиҳатдан тартибга солиш соҳасидаги норматив ҳужжатларни бузган ҳолда ўзгартириш ва (ёки) реконструкция қилганлик ҳамда бошқа яна бир қатор ҳаракатлар учун жиноий жавобгарлик юзага келишини назарда тутувчи ўзгартиришлар киритилмоқда.

Бундан ташқари, шаҳарсозлик тўғрисидаги қонунчиликни бузилиши одам ўлими ёки бошқа оғир оқибатларга сабаб бўлса бу учун алоҳида жиноий жавобгарлик белгилаши назарда тутилмоқда.

Бу борада қонун нормаларини бузиб, кўп квартирали уйлардаги таянч конструкцияларни ўзгартириш ва (ёки) реконструкция қилиш билан боғлиқ жиноятни биринчи марта содир этган ҳамда амалга оширилган ўзгартириш ёки бузилишларни, шунингдек уларнинг оқибатларини ихтиёрий равишда бартараф этган шахс жавобгарликдан озод этилиши мумкин.

Лойиҳалаш, қурилиш-монтаж ишлари бажарилаётганда талабларни бузиш, шунингдек қурилиш ва уй-жой коммунал хўжалиги соҳасида назорат қилиш ҳамда йўл-қурилиш ишлари сифатини назорат қилиш инспекцияларининг кўрсатмаларини бажаришдан қасддан бўйин товлаш ёки ўз вақтида бажармаганлик учун жарима жазоси белгиланмоқда.

Шунингдек, шаҳарсозликка оид қонунчилик талабларини бузганлик учун амалда белгиланган жарима жазолари кучайтирилмоқда.

Сенаторлар Қонуннинг маъқулланиши мамлакатимизда қурилишлар сифатини оширишга, бинолар ва иншоотлар қонунга хилоф равишда қурилишининг олдини олишга ҳамда шаҳарсозлик тўғрисидаги қонунчилик талабларига қатъий риоя этилишини таъминлашга хизмат қилишини таъкидлаб ўтдилар.

Муҳокама якунида Қўмитанинг тегишли қарори қабул қилинди.