Фото: Иллюстратив фото

Жорий йилнинг 16 ноябрь куни мамлакатимизнинг Жидда шаҳридаги Бош консуллигида Саудия Арабистонида истиқомат қиладиган таниқли ишбилармон, ўзбек диаспораси вакили Саид Муҳаммад Абдулқодир билан учрашув бўлиб ўтди.

Мулоқот чоғида Ўзбекистонда амалга оширилаётган кенг кўламли ислоҳотлар ва улар бераётган салмоқли натижалар, республикамиз ҳукумати томонидан хорижда яшаётган ватандошлар учун қаратилаётган эътибор, жумладан, бизнес қулайликлари, юртимиздаги сармоявий ва сайёҳлик муҳитининг жозибадорлиги ҳамда ҳаётга татбиқ этилаётган иқтисодий ислоҳотлар ҳақида атрофлича фикр юритилди.

Саид Муҳаммад Абдулқодир ресторан бизнеси билан шуғулланаётганини маълум қилар экан, ўз тамаддихонасида ўзбек миллий таомлари хилма-хиллигини янада кўпайтириш истагида эканлигини айтди. Унинг фикр билдиришича, ҳозирги пайтда саудияликлар ҳамда Марказий Осиёдан келаётган кўп сонли зиёратчиларнинг ўзбек миллий таомларига бўлган эҳтиёжи ортиб бормоқда. Шу боис у Жидда ва Макка шаҳарларида фаолият юритаётган “Salom“ ресторанининг бўлимларини Ар-Риёз ва Мадина шаҳарларида ҳам очиш юзасидан иш олиб борилаётганини айтар экан, шу мақсадда Ўзбекистондан ўн нафар тажрибали ва моҳир ошпаз, нонвой ва официантларни бир йил муддатга келишув асосида ишга таклиф этишини маълум қилди.

Учрашув сўнггида Саид Муҳаммад Абдулқодир мамлакатимиз билан амалий ҳамкорлик бундан кейин ҳам ривожланиб боришига умид билдирди.