Абдулазиз ЙЎЛДОШЕВ/«Халқ сўзи». Самарқанд шаҳрида Ўзбекистон Республикаси Қуролли Кучлари ташкил этилганининг 33 йиллиги ҳамда 14 январь — Ватан ҳимоячилари куни муносабати билан маънавий-маърифий тадбир ўтказилди.

Дастлаб ҳарбийлар ва куч тузилмалари ходимларининг жанговар юриши Ислом Каримов хиёбонидан бошланди ва Кўксарой майдонигача давом этди. Шундан сўнг Кўксарой майдонида ташкил этилган маънавий-маърифий тадбирда вилоят ҳокимлиги ва Марказий ҳарбий округ масъуллари ҳамда жамоатчилик вакиллари иштирок этди.

Тадбирда сўзга чиққанлар ҳарбий ватанпарварлик ойлигининг аҳамияти, соҳада хизмат ўтаётганлар зиммасига юкланган масъулият, уларни ҳар томонлама қўллаб-қувватлаш борасида амалга оширилаётган чора-тадбирлар ҳақида тўхталиб ўтилди. Соҳага қаратилаётган эътибор натижасида армиямиз салоҳияти йил сайин ортиб бораётганлиги таъкидланди.

Тадбир доирасида ҳарбий қурол-аслаҳалар кўргазмаси ташкил этилди. Унда ёшлар жанговар техника ва қуроллар билан яқиндан танишиб, ҳарбийларнинг шарафли вазифаларига оид қизиқарли маълумотларга эга бўлишди. Шунингдек, ҳарбийларнинг саф ва қўл жанги бўйича саҳналаштирилган машғулотлари ҳам намойиш қилинди.

Вилоят мусиқали драма театри ижодкорларининг бадиий чиқишлари тадбирга янада кўтаринки кайфият бағишлади.