Португалия терма жамоаси футболчиси Криштиану Роналду АҚШ Президенти Дональд Трампдан ҳам машҳурроқ эканини айтди. Бу ҳақда у журналист Пирс Морганга берган интервьюсида гапирган. Ушбу суҳбат футболчининг шахсий YouTube каналида эълон қилинган.

Криштиану Роналду интервьюда АҚШ Президентини жуда ҳурмат қилишини қайд этар экан, Трамп дунёда тинчликка эришиш жараёнида муҳим шахслардан бири ҳисобланишини таъкидлаган. Шунингдек, у Трамп билан учрашишни орзу қилишини ҳам маълум қилган.

«Мен бир куни у билан кўришишни ва суҳбатлашишни истайман, чунки у мен ҳурмат қиладиган инсонлардан бири», деган футболчи. Роналдунинг сўзларига кўра, уларни боғлаб турувчи қандайдир шахсий ўхшашлик бор, аммо футболчи ҳозирча буни ошкор этмайди.

Телебошловчи Пирс Морган Трампнинг ўғли Баррон Роналдунинг мухлиси эканини айтганида, Роналду Барронни ҳам уларнинг эҳтимолий учрашувига таклиф этишини билдирган.

Шу билан бирга, Роналду ўзини Дональд Трампдан ҳам машҳур деб ҳисоблашини таъкидлаб, бугунги кунда дунёда ундан машҳур инсон йўқлигини айтган. Бироқ у шон-шарафнинг баъзан зерикарли ва оғир бўлишини ҳам тан олган.

Португалиялик юлдуз Морган билан суҳбатда яқин йилларда футболчилик фаолиятини якунлаши ҳақида гап очган, аммо аниқ вақтни очиқламаган.