Қатар Ташқи ишлар вазирлиги Исроил бош вазири Биньямин Нетаньяҳунинг Доҳани террористларга паноҳ берганликда айблаган баёнотларини кескин қоралади.

«Қатар давлати бош вазир Биньямин Нетаньяҳунинг мамлакатимиз ҳудудида ҲАМАС офисини жойлаштириш ҳақида айтган беҳуда ва хавфли сўзларини қатъий тарзда рад этади», — дейилади вазирлик баёнотида.

Доҳа Нетаньяҳунинг айбловларини «Қатарга қилинган қўрқоқона ҳужумни оқлашга уриниш» сифатида баҳолади.

Шу билан бирга, вазирлик ҲАМАС офисини очиш АҚШ ва Исроилнинг ўзи томонидан сўралган воситачилик жараёни доирасида амалга оширилганини эслатди. Ушбу офис бир қатор гаровдагиларни алмашиш ва Ғазога нисбатан тузилган тинчлик келишувларида ҳал қилувчи роль ўйнагани, бу эса халқаро ҳамжамият томонидан юқори баҳолангани қайд этилди.

Қатар расмийлари ўз баёнотида Доҳа халқаро ҳамкорлар билан биргаликда ҳаракат қилиб, Нетаньяҳуни жавобгарликка тортиш ниятида эканини билдирди.

Эслатиб ўтамиз, аввалроқ Исроил бош вазири Қатарни террористларга паноҳ берганликда айблаб, Доҳага зарбалар АҚШнинг 11 сентябрдан кейин Афғонистонда бошлаган ҳарбий амалиёти каби «асосли» эканини айтган эди.