Фото: Самарқанд вилояти Экология бошқармаси

Самарқанд ва Қашқадарё вилоятлари чегарасида жойлашган Кункўрмас довонининг Қашқадарё вилояти ҳудудида Ўрта Осиё қўнғир айиқлари чўпонларнинг 4 бош эчкисини еб қўйди. Бу ҳақда Самарқанд вилояти Экология бошқармаси матбуот хизмати хабар берди.

Маълум қилинишича, мазкур ҳолат Самарқанд вилояти Экология, атроф-муҳитни муҳофаза қилиш ва иқлим ўзгариши бошқармаси ва унинг Ургут тумани инспекцияси давлат инспекторлари томонидан тезкор тартибда назоратга олинган.

Аниқланишича, Сув сатҳидан 2500-2700 метр баландликдаги ушбу ёввойи табиатга тегишли бўлган айиқларнинг яшаш манзилида Ургут тумани Сойғус МФЙнинг чўпонлари ижара асосида мол қўйларини боқаётганда ноёб тур ҳисобланган Ўрта Осиё қўнғир айиқлари 4 бош эчкини еб қўйган. Чўпонларга ёки айиқларга талафот етмаган.

Шунингдек, маҳаллий аҳолининг таъкидлашича, 2 кун бурун кечасида айиқлар Сойғус МФЙга 2-3 километр яқинликдаги тоғ бағрида ўсувчи мевали дарахтларни ейиш учун тушиб келган.

«Ҳозирда тегишли мутахассислар томонидан ҳолат назоратга олиниб ўрганиш ишлари давом этмоқда», дейилади хабарда.