2024 йилнинг январь-октябрь ойлари давомида Ўзбекистонга 57,7 минг нафар Хитой фуқаролари туристик мақсадларда ташриф буюрган. Бу кўрсаткич 2023 йилнинг шу даври билан солиштирилганда 22,3 минг нафарга ёки 63,1 фоизга ошганини кўрсатади. Туризм соҳасидаги бу ижобий ўсиш Ўзбекистоннинг халқаро миқёсдаги жозибадорлигини янада оширмоқда.

Ташриф буюрган хитойлик фуқароларнинг аксарияти сайёҳлик мақсадида келган бўлиб, уларнинг сони 50 минг 52 нафарни ташкил қилди. Хизмат сафарлари учун ташриф буюрганлар сони 4 минг 732 нафарга етган. Қариндошларни йўқлаш мақсадида келганлар эса 1 121 нафарни ташкил этяпти. Шунингдек, 1085 нафар хитойлик тижорат мақсадида, 708 нафар ўқиш ва 2 нафар даволаниш учун ташриф буюрган.

Туристлар сонининг ошиши Ўзбекистондаги сайёҳлик салоҳиятининг юқори эканлигидан далолат беради. Буни хорижлик меҳмонлар учун қулай шароитлар, виза расмийлаштиришдаги енгилликлар ва маданий-тарихий меросга бўлган қизиқиш билан изоҳлаш мумкин. Хитойлик сайёҳлар учун ўзбек миллий анъаналари, меъморий обидалар ва гастрономик таомлар асосий қизиқиш нуқталари бўлиб қолмоқда.

Ўзбекистоннинг Статистика агентлиги маълумотларига кўра, Хитойдан ташриф буюрувчилар сонининг ошиши туризм соҳасини янада ривожлантириш учун катта имконият яратади. Бу ҳолат келгусида Хитой билан туризм соҳасида ҳамкорликни янада мустаҳкамлашга асос бўлиши мумкин. Шунингдек, бундай натижалар мамлакат иқтисодиёти учун ҳам ижобий самара келтириши кутилмоқда.