«Ўзбекистонда коронавирус билан боғлиқ вазият, вакцинация жараёнларига тайёргарлик» мавзусида матбуот анжумани карантин қайтадими деган саволга жавоб берилди. 

Анжуманда Нурмат Отабеков карантин чораларининг кучайтирилиши ҳақида фикр билдирди.

«Карантин яна кучайтириладими, яна кескинлашадими, ҳаракатлар чекланадими деган саволлар жуда ҳам кўп. 

Чеклов тадбирларини қандай тартибда бўлиши ёки карантин тадбирларининг татбиқ этилишига ўзимиз сабабчимиз. Агар биз ҳали бекор қилинмаган ёки ниқобда бўлиш, ижтимоий масофани сақлаш, антисептик воситалардан фойдаланиш ва аҳоли гавжум бўлган жойларга боришдан ўзимизни тийиш каби қоидаларни ёдимиздан чиқармасак, касаллик манбаидан иккинчи соғлом одамга юқишига йўл қўймайдиган чораларни кўрадиган бўлсак, карантин тадбирларини кескинлашишига ҳеч қандай асос бўлмайди.

Шу билан биргаликда биз ҳаддан ортиқ хотиржамликка берилиб кетдик. Бу табиий касалликнинг, статистик рақамларнинг ортиб боришида намоён бўляпти», деди Отабеков.

Шунингдек Анвар Алимов карантин чоралари кучайтирилиши билан боғлиқ миш-мишларга ойдинлик киритди.

«Куни кеча ўтказилган халқ депутатлари шаҳар кенгаши йиғилишида қабул қилинган қарорда бирорта янги, кучайтириш бўйича банд йўқ.

Бугун фақатгина мавжуд талаблар устидан назоратни кучайтириш масаласи кўриляпти. Талаб этилаётган энг асосий уч нарса — ниқоб тақиш, қўл ювиш, ижтимоий масофани сақлаш», деди Алимов.

Инобат АҲАТОВА, 

«Халқ сўзи»