Фото: Президент матбуот хизмати

Ўзбекистон Президенти Шавкат Мирзиёев Покистоннинг шимоли-ғарбий ҳудудларида юз берган кучли ёғингарчилик ва сув тошқинлари оқибатида кўплаб инсонларнинг ҳалок бўлгани ва жароҳат олгани муносабати билан Президент Асиф Али Зардарий ва Бош вазир Шаҳбоз Шарифга таъзия йўллади. Бу ҳақда Президент матбуот котиби Шерзид Асадов хабар берди.

Давлат раҳбари марҳумларнинг оила аъзолари ва яқинларига ҳамдардлик билдириб, жароҳатланганлар тез фурсатда соғайиб кетишини тилаган.

Жанубий Осиёда кучли муссон ёмғирлари ва ер кўчкилари

Сўнгги бир ярим ойда Покистон шимоли ва мамлакат назоратидаги Кашмир ҳудуди бўйлаб муссон ёмғирлари келтириб чиқарган сув тошқинлари оқибатида камида 307 киши ҳалок бўлди. «Al Jazeera» нашрида хабар берилишича, рақамлар бундан ҳам кўп — 330 нафарга етган.

Манбага кўра, энг кўп талафотлар мамлакат шимоли-ғарбидаги тоғли Хайбер Пахтунхва провинциясида қайд этилган (307 киши). Гилгит-Балтистон ҳудудида 12 киши, Азад-Кашмир ҳудудида эса 11 киши вафот этган.

Қутқарув гуруҳлари тоғли ҳудудларда қолиб кетган 1,3 минг нафар туристни эвакуация қилган. Шунингдек, вайрон бўлган бинолар остидан жасадлар чиқариб олинмоқда. Покистон метеорология хизмати мамлакат шимоли-ғарбий қисмида 21 августгача кучли ёмғирлар давом этишини маълум қилган.

Айтиш жоиз, Жанубий Осиё, хусусан, Покистонда ҳар йили июль-сентябрь ойлари давомида кузатиладиган муссон мавсумида рўй берадиган тошқинлар ва кўчкилар юзлаб одамларнинг ҳаётига зомин бўлади ва катта моддий зарар келтиради.