Ўзбекистон элчиси Амирсаид Аъзамхўжаев Польша Президенти Анжей Дудага ишонч ёрлиқларини топширди.

Тақдимот маросими Польша раҳбарининг расмий қароргоҳи – Варшавадаги Бельведере саройида бўлиб ўтди.

Расмий маросим доирасида бўлиб ўтган суҳбат чоғида Польша Президенти барча соҳаларда икки томонлама ҳамкорликни янада фаоллаштиришдан манфаатдор эканини тасдиқлади. Польша Ўзбекистонни Марказий Осиёдаги муҳим ва истиқболли ҳамкор деб билиши, мамлакатимизда амалга оширилаётган кенг кўламли ва ортга қайтмас ислоҳотларни ҳар томонлама қўллаб-қувватлаши алоҳида таъкидланди.

Қайд этилганидек, сўнгги йилларда Ўзбекистон-Польша ҳамкорлиги, айниқса, савдо-иқтисодий соҳада сезиларли даражада мустаҳкамланиб, янги ва амалий мазмун билан тўлдирилди. Польша ишбилармон доираларида ўзбекистонлик ҳамкорлар билан алоқаларни ривожлантиришга қизиқиш ортиб бормоқда. Икки томонлама муносабатларни сифат жиҳатидан янги босқичга кўтариш учун салмоқли салоҳият мавжуд.

Польшалик генерал Владислав Андерснинг аскарлари дафн этилган масканни обод этиш бўйича кўрилаётган чора-тадбирлар учун Ўзбекистон ҳукуматига миннатдорлик билдирилди.

Ишонч ёрлиқлари топширилгандан сўнг элчи Варшавадаги Номаълум аскар қабрига гулчамбар қўйиш маросими қатнашди.

Эслатиб ўтамиз, Ўзбекистоннинг янги элчиси 7 ноябрь куни Варшавага ташриф буюрган эди. Бунга қадар у ТИВнинг Консуллик-ҳуқуқий департаментида, Ўзбекистоннинг Истанбулдаги бош консули лавозимларида ишлаган. Дипломат 38 ёшда. Тошкент давлат жаҳон тиллари университетини тамомлаган.