Валюта айирбошлаш билан шуғулланиб келган шахслар ушланди. Бу ҳақида Иқтисодий жиноятларга қарши курашиш департаменти хабар берди.

Унда айтилишича, Ангрен шаҳри бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда валюта айирбошлаш билан шуғулланиб келган фуқаро О.Х. фуқаро К.Ш.га 4 минг АҚШ долларини 48,8 миллион сўмга сотган вақтида ушланиб, ундан 138 АҚШ доллари, 16 минг 30 Россия рубли, 19,8 сўм, 100 Сербия динари, 5 Туркия лираси ашёвий далил сифатида расмийлаштириб олинган.

Шу каби яна бир ҳолат, департаментнинг Чортоқ тумани бўлими ходимлари томонидан ўтказилган тезкор тадбирда ҳам аниқланиб, муқаддам судланган фуқаро Э.Қ. 4 минг АҚШ долларини 48,4 миллион сўмга фуқаро У.Ю.га сотган вақтида ашёвий далиллар билан ушланган.

Шунингдек, департаментнинг Бўстонлиқ тумани бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбир давомида фуқаро М.Ш. фуқаро К.О.га 4 минг АҚШ долларини 48 миллион сўмга сотган вақтида ашёвий далиллар билан қўлга тушган.

Бундан ташқари, департаментнинг Бекобод туманида ўтказилган тезкор тадбирда фуқаро Н.Б. ва бошқалар фуқаро Г.О.га 38 минг 460 тожик сомонини 50 миллион сўмга сотган вақтида ашёвий далиллар билан ушланган.

Ҳозирда мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда.