Бугун, 9 январь куни ижтимоий тармоқларда Оққўрғон туманидаги «Тош» каналига 13 та эшакнинг суяклари ташлаб кетилгани ҳақидаги видеолар тарқалди. Ҳолат юзасидан Оққўрғон тумани матбуот хизмати маълумот берди.

Маълум қилинишича, воқеа туманнинг «Қўрғонтепа» МФЙ ҳудудида содир бўлган. Маҳалла аҳолиси ва масъуллар билан суҳбатлашиб, ҳуқуқбузарларни аниқлаш чора-тадбирлари кўрилмоқда.

Ҳолат юзасидан ишчи гуруҳ тузилган ва ўрганиш ишлари бошлаб юборилган. Ҳолат бўйича қўшимча ахборот берилади, дейилади матбуот хизмати хабарида.

Шунингдек, Ички ишлар Бош бошқармаси бошлиғининг Матбуот котиби Бобур Туляганов Оққўрғон туманидаги ҳолат юзасидан вазирлик муносабатини билдирди. «Оққўрғон туманида сувга ҳайвон суяклари ташлаб кетилаётганлиги ҳолати Тошкент вилояти ИИББ назоратига олинган», дейилади хабарда.

Аниқлаштирилишича, 3 нафар шахс шу ишга гумондор сифатида жалб қилинган ва терговга қадар текширув ҳаракатларига киришилган.

Ҳозирда ИИББ Карантин тадбирларини ташкил қилиш бўлинмаси ходимлари томонидан ҳамкорликдаги ташкилотлар билан Оққўрғон туманида аниқланиб Оҳангаронда фош этилган мазкур ҳолат юзасидан қўшимча суриштирув ва ҳудудни дезинфекциялаш ишлари олиб борилмоқда.