Бугун, 22 ноябрь куни Ўзбекистон Суперлигасининг 29-тур ўйинлари бўлиб ўтди. Турни якунлаб берган учрашувда «Нефтчи» клуби ўз майдонида «Қизилқум»ни қабул қилди. Ушбу ўйинда қўлга киритилажак ғалаба Виталий Левченко жамоасини муддатидан олдин мамлакат чемпионига айлантирарди. Амалда ҳам шундай бўлди.

Учрашув 3-дақиқасидаёқ ҳисоб очилди. Билолхон Тошмирзаевнинг узатмасидан сўнг, Алишер Одилов ҳисобни очди. Орадан 15 дақиқа вақт ўтиб, Одиловнинг ўзи ҳисобни 2:0 кўринишига келтирди. Биринчи бўлим шу ҳисоб билан якунланди.

60-дақиқада Шоҳруз Норқонов ҳисобни қисқартирди. 65-дақиқада эса Жамшид Искандеров ҳисобни 3:1 кўринишига келтирди. 87-дақиқада эса Иброҳимҳалил Йўлдошев ўйиндаги сўнгги голни киритди. Якуний ҳисоб — 4:1.

Шу тариқа «Нефтчи» клуби чемпионат якунига 1 та тур қолганда энг яқин таъқибчисидан 5 очкога олиб кетди ва мусобақа ғолибига айланди. Энди жамоа келгуси мавсум Элит Осиё чемпионлар лигаси мусобақасида Ўзбекистон шарафини ҳимоя қилади.

Маълумот учун, бу «Нефтчи» жамоаси тарихидаги олтинчи чемпионлик ҳисобланади. Бунгача жамоа сўнгги бор 2001 йилда мамлакат чемпионатида ғолиб бўлган эди.