Экотуризм объектларини шакллантириш, уларнинг фаолиятини йўлга қўйиш мақсадида Экология ва атроф-муҳитни муҳофаза қилиш Давлат қўмитаси томонидан вилоятдаги экологик ландшафт ҳудудлари ўрганиб чиқилиб, 10 га яқин экотуризм масканлари учун жойлар танланди.

Жумладан, Сирдарё дарёсининг Поп тумани Кенагас қишлоғи ҳудудидан оқиб ўтган қисмидаги табиий оролнинг 6 гектар ер майдони, Қамчиқ довонидаги 0,5 гектарлик тоғлик ҳудуд, дарёнинг Тўрақўрғон тумани ҳудудидан оқиб ўтган қисмидаги 2,48 гектар ер майдони, Мингбулоқ тумани «Алами» қишлоғидаги 3 гектарлик қум барханлари, Чуст туманидаги Резаксой сув омборининг 10 гектарлик муҳофаза ҳудудлари, Янгиқўрғон туманидаги Эскиер сув омборининг 3 гектарлик муҳофаза зонаси, Нанай қишлоғидаги Подшоота сойининг 2 гектарлик муҳофаза зонаси, Чортоқ туманидаги Чортоқ сув омборининг 5 гектарлик сув муҳофаза зонаси, Норин дарёсининг Наманган тумани Кайковус қишлоғи ҳудудидан оқиб ўтган қисмидаги 2,5 гектар сувни муҳофаза зоналари ўрганиб чиқилди.

Ўрганилган ер майдонлари экотуризмни ривожлантириш бўйича мақбул объектлар бўлиши билан бир қаторда вилоят иқтисодиётини янада юксалтириш, янги иш ўринлари яратиш, аҳоли дам олишини ташкил этиш ва саломатлигини тиклашда муҳим омил бўлади.

Айни пайтда мазкур ҳудудларда замонавий талабларга асосланган экотуризм манзиллари ташкил этиш ҳамда керакли инфратузилмани шакллантириш бўйича чора-тадбирлар ишлаб чиқилмоқда.

Қудратилла НАЖМИДДИНОВ,
«Халқ сўзи».