Тошкентда банкка бостириб кириб, ходимларга ўйинчоқ тўппонча билан таҳдид қилиб, пулларни ўмармоқчи бўлган шахс 5 йилга озодликдан маҳрум қилинди. Бу ҳақда «Миллий» телеканалида хабар қилинди.

Қайд этилишича, 18 апрель куни соат 16:30 атрофида ниқоб кийган номаълум шахс кўринишидан тўппончага ўхшаган буюм билан банк ишчисидан пул талаб қилган. Шундан сўнг у Қўриқлаш бошқармаси ходимлари келганида марказ ойнасини синдириб қочиб кетаётганида қўлга олинган.

Маълум бўлишича, эркакнинг қўлидаги тўппонча набирасининг ўйинчоғи бўлган. Судда прокурор эркакка 9 йил қамоқ жазоси берилишини сўради.

«Эрталаб уйдан чиққанимда набирамнинг кичкина ўйинчоқ тўппончаси чўнтагимда қолиб кетган экан. Озгина олди бердим бор эди. Билмадим нега бу ишни қилдим ўзим ҳам ҳайронман. Қарзлар сабаб тушкунликка тушган эдим. Юнусободга келиб, шу ишни қилиб қўйдим», деган фуқаро.

Ҳукмга кўра, эркак Жиноят кодексининг 164-моддаси 1-қисмида (Ўзганинг мол-мулкини талон-торож қилиш мақсадида ҳужум қилиб, ҳаёт ёки соғлиқ учун хавфли бўлган зўрлик ишлатиб ёхуд шундай зўрлик ишлатиш билан қўрқитиб содир этилган босқинчилик) кўрсатилган жиноятни содир этган деб топилиб, унга 5 йил муддатга озодликдан маҳрум қилиш жазоси тайинланди. Жазони умумий тартибли колониясида ўтаттириш белгиланди.

Аввалроқ ушбу фуқаронинг қўлга олингани тўғрисида хабар қилгандик.