Норматив- ҳуқуқий ҳужжатлар лойиҳалари муҳокамаси порталида Вазирлар Маҳкамасининг "Ёқилғи-энергетика соҳасида бозор механизмларини жорий этишнинг қўшимча чора-тадбирлари тўғрисида"ги қарори лойиҳаси жойлаштирилди.

Лойиҳада йирик корхоналар, давлат идоралари ва юридик шахслар учун электр энергияси ва газ тарифлари ошиши кўзда тутилган. Тарифлар оддий аҳоли учун оширилмайди.

Қарорда юридик шахслар учун газ тарифларининг ошиши муносабати билан автомобилларга газ тўлдириш компрессор шохобчаларида (АГТКШ) метан газ нархи ҳам кескин кўтарилиб кетмаслиги учун чоралар кўриш назарда тутилган.

Унга кўра, табиий газни сотишда унинг энг баланд чакана нархи келгуси олти ойда куб метр учун 3 250 сўмдан ошиб кетмаслиги бўйича қатъий чоралар кўрилади.

Бунда, онлайн режимда маълумотлар узатмаётган, чакана сотишда чекланган нархнинг асоссиз оширилишига, ноқонуний уланишга, ёқилғи-энергия ресурсларини талон-торож ва ноқонуний истеъмол қилинишига йўл қўйган автомобилларга газ тўлдириш компрессор шохобчаларига табиий газ етказиб беришни тўхтатиш чоралари кўрилади.