АҚШ президенти Дональд Трамп ўзининг учинчи муддатга сайланиши ҳақидаги миш-мишларга ойдинлик киритди. Трамп бу ҳақида «NBC News» нашрига берган интервьюсида тўхталиб ўтган.

Таъкидланишича, Трамп ўзининг иккинчи президентлик муддати тугагач, Оқ уйни тарк этади. У, шунингдек, 2028 йилги президентлик сайловида Республикачилар партияси номидан амалдаги вице-президент Жей Ди Венсни номзод сифатида кўраётганини билдирган.

«Мен 8 йил президент бўламан. Бу мен учун доим муҳим бўлиб келган. Ажойиб тўрт йилни якунлаб, Оқ уйни тарк этишни режалаштиряпман. Кейинги президентлик сайловида эса Республикачилар партиясидан Жей Ди Венсни номзод сифатида кўряпман. Венс биз бошлаган ишларни муносиб давом эттиради. Бу ҳақида гапиришга ҳали эрта, лекин мен ўзимнинг вице-президентимга ишонаман, у жуда яхши иш олиб бормоқда», — дейди Америка етакчиси.

Маълумот учун, АҚШ Конституциянинг 22-тузатишида ҳеч ким президентлик лавозимига икки мартадан ортиқ сайланиши мумкин эмаслиги қатъий белгилаб қўйилган. Ушбу чекловни бекор қилиш учун Конституцияга ўзгартириш киритилиши керак бўлади, аммо бу жуда қийин бўлиб, палата ва Сенатнинг учдан икки қисми ёки штатлар қонун чиқарувчи органларининг учдан икки қисми ушбу таклифни қўллаб қувватлаши талаб қилинади.

Эслатиб ўтамиз, аввалроқ, Қўшма Штатлар Конституциясининг 22-тузатиши президентларга икки муддатдан ортиқ ушбу лавозимни эгаллашни тақиқласада, мазкур тузатмадаги бир бўшлиқ туфайли Трамп учинчи, ҳатто тўртинчи муддатга ҳам президент сифатида қолиши мумкинлиги ҳақида хабарлар тарқалган эди.

АҚШ Конституциясининг 22-тузатишидаги мавжуд бўшлиқ шуни кўрсатадики, президент икки мартадан ортиқ сайлана олмаса ҳам, улар ўз ваколатини ворислик орқали сақлаб қолишлари мумкин бўлади.

Мазкур ҳолат ҳуқуқшунослар ва амалдаги давлат раҳбари Дональд Трамп тарафдорлари орасида эътиборни жалб қилган эди.