Аргентиналик таниқли футбол мураббийи Маурисио Почеттино АҚШнинг футбол бўйича эркаклар терма жамоасининг янги бош мураббийи этиб тайинланди. У 2026 йилги футбол бўйича жаҳон чемпионатига тайёргарлик кўраётган, АҚШ Мексика ва Канада билан биргаликда ўтказиладиган терма жамоани бошқариши кутилмоқда.

Почеттино бунгача Европанинг «Тоттенхем», «ПСЖ» ва «Челси» каби етакчи клубларини бошқарган. Унинг жалб этилиши АҚШ футболи учун катта қадам сифатида қаралмоқда, чунки миллий терма жамоа асосан Олий Лига футболи мураббийларига таянарди. АҚШ футбол федерацияси президенти Синди Парлоу Кони Почеттинонинг иштиёқи ва инновацион мураббийлик услубини юқори баҳолади.

Айни пайтда дунё рейтингида 16-ўринни эгаллаб турган АҚШ эркаклар терма жамоаси Янги Зеландияга қарши ўртоқлик ўйини ўтказади, аммо Почеттино бу ўйинда жамоага ёрдам бермайди. Унинг илк ўйинлари октябр ойида Мексика ва Панамага қарши бўлиши кутилмоқда.

Америка Қўшма Штатлари «Copa America» турниридаги муваффақиятсиз иштирокидан сўнг Грег Берхалтер билан хайрлашган эди. Берхалтер жамоага 2022 йилги жаҳон чемпионатида 1/8 финалга чиқишга ёрдам берган бўлса, сўнгги натижалар унинг ишдан бўшатилишига олиб келганди.

Аввалроқ, Ўзбекистон шахмат терма жамоаси бугун Тринидад ва Тобаго ҳамда Ҳаитига қарши дона суриши ҳақида хабар бергандик.