Фото: Архив сурат

Ўзбекистон Марказий банкининг маълумотига кўра, жорий йилнинг иккинчи чорагида мамлакатда кўчмас мулк бозорида фаоллик юқори бўлиб қолмоқда.

Ҳисоботда қайд этилишича, ушбу чоракда 88,1 мингта кўчмас мулк бўйича битим расмийлаштирилган — бу ўтган йилнинг шу даврига нисбатан 9,9 фоизга кўп.

Жорий йилнинг биринчи ярмида эса ушбу кўрсаткич 148,4 мингтага етди. Бу ўтган йилнинг шу даврига нисбатан 12,1 фоизлик ўсиш демакдир.

Мутахассислар бу фаолликни ипотека кредитлари ҳажмининг ошгани, аҳоли даромадларининг ўсиши ва уй-жой қурилишидаги инвестициялар кўпайгани билан боғлашмоқда.

Нархлар динамикасига келсак, иккинчи чоракда бозорда барқарорлик кузатилган. Хусусан, Тошкент, Тошкент вилояти, Самарқанд ва Навоий вилоятларида нархлар ўсган ёки жуда секинлашган. Бошқа ҳудудларда эса паст нархлар, инфратузилманинг яхшиланиши ва талабнинг ортиши нархлар ўсишига туртки бўлмоқда.

Марказий банк маълумотларига кўра, Тошкентда иккиламчи бозордаги уй-жой нархлари бир ой ичида 1 кв.м. учун 15,28 млн сўмдан 14,9 млн сўмгача тушган. Тошкент вилоятида эса ушбу кўрсаткич 8,33 млн сўмдан 8,21 млн сўмгача пасайган.

Ижара бозорида нархлар барқарорлигича қолмоқда — июнь ойи якунларига кўра, йиллик ўсиш атиги 0,3 фоизни ташкил этди. Шу билан бирга, Тошкентда ижара нархлари пасайишда давом этмоқда: йиллик кесимда 6,1 фоизлик тушиш кузатилди.

Ер участкалари бозорида эса Тошкентда 100 кв.м. (1 сотих) ернинг нархи ўртача 334 млн сўмни ташкил этди. Бу ўтган йил июнига нисбатан 2,5 фоизга кам.