Шаҳрихон туманидаги “Қўрғонча”, “Туркистон”, “Қашқар”, “Дориломон” ва “Оқ олтин” маҳаллаларида кузнинг салқин ҳавосида ҳам одамлар юзидан мамнуният балқиб турибди. Сабаби табиий газ билан боғлиқ масалаларни ҳал қилиш учун эндиликда идорама-идора сарсон бўлишнинг ҳожати йўқ. Ҳар бир маҳаллада ўзининг масъул “газчи”си бор. Улар аҳолининг яқин кўмакчисига айланиб улгургани ҳам эътиборга молик.

Шундай ходимлардан бири — Иброҳимжон Қувватов ҳар тонгда “Hudud mobile” дастури орқали топшириқлар билан танишади. Бугун, масалан, бир хонадонда ҳисоблагич сим картасини янгиласа, бошқа бир ерда қувватлагични алмаштириши керак. Ҳар бир хонадонда у нафақат ускуналар ҳолатини кўздан кечиради, балки оддий одамлар билан суҳбат қуриб, уларнинг фикр-мулоҳазасини эшитади.

— Бир куни Муроджон Қўрчиев хонадонида дастурда кўрсатилган носозликни бартараф этиш учун бўлдим, — дейди Иброҳимжон. — Ҳисоблагич маълумот узатмаётган эди. Қисқа вақт ичида ускунани тузатиб, дастурга қайта уладим. Энди маълумотлар онлайн равишда тўғридан-тўғри узатиляпти. Бу тизим фаолиятимизга аниқлик киритди, вақт тежаяпти, энг муҳими, одамларнинг ишончи ортиб бормоқда.

“Газчи”лар фақат техник муаммоларни ҳал этиш билан чекланмаяпти. Фуқаролар билан мулоқот давомида табиий газдан хавфсиз фойдаланиш, энергия тежамкор ускуналарни танлаш ва ис гази билан боғлиқ хатарларнинг олдини олиш ҳақида маслаҳатлар беради. Шу орқали хавфсизлик посбонига ҳам айланмоқда.

“Маҳаллабай” тизими туфайли истеъмолчи билан хизмат кўрсатувчи орасидаги “девор” олиб ташланди. Энди фуқаро муаммосини ёзма ариза орқали ёки қатор идоралар қатнаб эмас, балки маҳалласининг ўзида ҳал қилади. Бу эса газ таъминоти тизимига нисбатан одамларнинг ишончини янада мустаҳкамламоқда.

Саминжон ҲУСАНОВ

«Халқ сўзи».