Ўз уйидан қувилган фаластинликлар

ҲАМАС Исроил раҳбарини сулҳ ва гаровга олинганларни озод қилиш бўйича музокараларга тўсқинлик қилишда айбламоқда.

ҲАМАС раҳбари Исмоил Ҳания душанба куни қилган баёнотида Ғазодаги воқеаларнинг ҳалокатли оқибатлари музокаралар жараёнини эски ҳолатга қайтариб қўйишидан огоҳлантирди.

Баёнотда айтилишича, Ғазо маҳаллаларида ҳаддан ташқари кўп эвакуация қилиш ҳолатлари кўпаймоқда. Минглаб фаластинликлар бир жойдан иккинчи жойга кўчиб ўтмоқда. Якшанба куни Исроил ҳарбийлари шимолдаги Ғазо шаҳрининг Туффаҳ, Дараж ва Эски Шаҳар маҳаллаларини зудлик билан эвакуация қилишга буйруқ берган.

Гуруҳнинг таъкидлашича, бундай тажовузкорликлар келишувга эришиш учун барча саъй-ҳаракатларни тўхтатишга қаратилган.

«Al Jazeera» журналисти кўчишга қарор қилмаган фаластинликлар билан гаплашганда бориш мумкин бўлган хавфсиз жойнинг ўзи йўқлигини айтишган.

Исроил кучлари 8 июль куни чодир лагерларида рейд ўтказиб, 4 нафар исроилликни қутқариш учун 274 фаластинликни ўлдирган.

Маълумотларга кўра, Исроил кучлари Ғазодаги Шужая атрофида қуруқликдаги операцияларни кенгайтирган. Қўшинлар мактаб ва клиникаларга бостириб кириб, вайрон қилмоқда. Шунингдек, Римал маҳалласини эвакуация қилиш бўйича буйруқ берилган.

Исроилнинг янги ҳужуми Миср, Қатар ва Қўшма Штатлар Исроил ва ҲАМАС ўртасида ўт очишни тўхтатиш келишувига воситачилик қилиш ҳаракатларини кучайтирган пайтга тўғри келди.

Украина касалхонасига ҳужум

8 июль куни Россиянинг Киевга бир нечта баллистик ва қанотли ракеталарни учириши оқибатида камида етти киши ҳалок бўлди.

Илғор «Кинжал» гипертовушли ракеталарини ўз ичига олган ҳужум Украина пойтахти бўйлаб портлаш ва ёнғинларга сабаб бўлди. Хусусан, ушбу ҳужум оқибатида ҳудуддаги болалар касалхонаси ҳам катта зарар кўрди.

«Euronews» нашрининг хабар беришича, овоз тезлигидан ўн баравар тез учадиган «Кинжал» ракеталарини тутиб олиш қийин. Гувоҳлар ва маҳаллий оммавий ахборот воситалари портлашлардан бинолар силкинганини тасвирлаган. Уриб туширилган ракета қолдиқлари бир қанча туманларда, жумладан Соломенский, Днепровский, Голосеевский ва Шевченковский туманларида ёнғинларга сабаб бўлди.

Фавқулодда вазиятлар хизмати бир нечта аҳоли пунктларида қалин тутун кўтарилганини қайд этган. Вайронага айланган бинолар орасида болалар шифохонаси ҳам бўлиб, қутқарув ишларининг долзарблигини оширди. Ҳужум пайтида кўплаб одамлар кўчада бўлган ва бу қурбонлар сонини ошишига хизмат қилиши мумкин.

Бу ҳужумлар тўлқини Вашингтондаги муҳим НАТО саммити олдидан содир бўлди. Учрашувдан мақсад иттифоқчиларнинг Украинага можаро кучайиб бораётганини қўллаб-қувватлаш стратегиясини белгилашдан иборат. Украина президенти Владимир Зеленский ушбу оғир қийинчиликлар шароитида халқаро ёрдамни давом эттириш зарурлигини таъкидлади.

Ушбу ҳужумдан кейин Жо Байден Украинанинг ҳаво мудофаасини кучайтиришга ваъда берган.

НАТО саммити

НАТО ҳозир иккига бўлинган ва шу йилнинг 9-11 июль кунлари Вашингтонда бўлиб ўтган саммитнинг натижаси ноаниқ. Бу фикрларни БМТнинг Нью-Йоркдаги Шиллер институти вакили Ричард Блек айтиб ўтди.

Шу ўринда у ўтган ҳафта Венгрия бош вазири Виктор Орбан Украина етакчиси Владимир Зеленский, Россия президенти Владимир Путин ва Хитой раҳбари Си Сзинпин билан бир қатор шахсий тинчлик музокараларини ўтказганини эслатди.

«Ҳеч бўлмаганда, бу урушни тугатиш бўйича музокараларга олиб келиши мумкин», дейди Блек.

Экспертнинг аниқлик киритишича, бўлажак саммитда Венгрия ва Словакия вакиллари – Украина инқирозини дипломатик йўл билан ҳал этиш тарафдори бўлган давлатлар раҳбарлари иштирок этади. Шунингдек, Франция, Буюк Британия, Германия ва АҚШдан вакиллар бўлади.

«Натижа ноаниқ», деб башорат қилмоқда эксперт ва альянс ичида бўлиниш ҳақида қайд этиб.

Аввалроқ, НАТОнинг Вашингтондаги саммитида Украинага ёрдам кўрсатиш борасида бир қанча йирик билдиришлар бўлиши айтилганди.

Жумладан, Оқ уйнинг стратегик алоқалар бўйича координатори Жон Кирбининг айтишича, НАТО Киевни қўллаб-қувватлаш учун ҳарбий-сиёсий ҳамкорликни мустаҳкамлаш бўйича янги қадамларни эълон қилади.

«Сиз ҳаво мудофааси, мудофаа саноат базаси бўйича билдиришлардан хабардор бўласиз», дейди Кирби.

Моди ва Путин келишуви

Путин Украина билан урушга жалб қилинган барча ҳиндистонликларни Россия армиясидан четлаштиришга ваъда берди.

Ушбу масалани Ҳиндистон бош вазири Нарендра Моди Москвада бўлиб ўтган Владимир Путин билан учрашувда кўтарган. Путин Россия армиясига чақирилган барча Ҳиндистон фуқароларини четлатишга ва уларнинг қайтишига кўмаклашишга рози бўлган.

Март ойида Ҳиндистон расмийлари алдов йўли билан, Россия томонидан Украинага жангга жўнатилган одамлар савдоси тармоғини фош этганини маълум қилган эди. Ҳиндистон марказий тергов бюросига кўра, Россия армиясига шу йўл билан камида 35 нафар ҳиндистонлик фуқаро жўнатилган.

Ҳозирда Украина билан урушда камида икки Ҳиндистон фуқароси ҳалок бўлгани маълум.