Таълим назорати Telegram-каналида кичик ёшдаги ўқувчиларнинг миллий сертификат имтиҳонида қатнашиши учун қай тартибда ариза берилиши тўғрисида маълумот берилди.

Унда айтилишича, миллий сертификат имтиҳонида қатнашиш учун ID-карта ёки паспорти бор талабгорлар «my.gov.uz» сайтида ўзларининг шахсий кабинетлари орқали, кичик ёшдагилар эса ота-онасининг профили билан ариза топшириши мумкин.

Имтиҳонга вояга етмаган шахснинг ота-онаси бирга бориши шарт эмас. Ўқувчи «Туғилганлик ҳақида гувоҳнома» ҳамда агентлик томонидан тақдим этилган рухсатнома билан бориши керак бўлади.

Ариза бериш жараёнида қуйидаги расмда кўрсатилгандек икки категориядан бирини танлашингиз керак. Агар сиз вояга етмаган фарзандингиз учун ариза топшираётган бўлсангиз, «Аризачининг вояга етмаган фарзанди» бандини танлашингиз талаб этилади.

Кейинги босқичда эса, айнан имтиҳон топширмоқчи бўлган фарзандингизнинг исм-фамилиясини танлайсиз ва унинг расмини юклашингиз керак.

Шунингдек, ICAO стандартига мувофиқ фотосуратларга қўйиладиган талаблар мавжуд. Жумладан:

Сурат сифати:

• фотосурат ҳужжатларни топширишдан камида 6 ой олдин олиниши керак
• фотосурат ўлчами 35×45 мм, фотосурат рангли бўлиши керак, юз ва елканинг юқори қисми фотосуратга тўлиқ мос келиши керак, юзнинг ўлчами фотосуратнинг 70-80% ни ташкил қилади.
• тасвир аниқ ва контрастли бўлиши керак
• фотосурат юқори сифатли, сиёҳ доғларисиз бўлиши керак
• суратга тушаётган шахс тўғридан-тўғри камерага қараши керак
• тери ранги табиий бўлиши керак
• ёрқинлик/контраст ўртача бўлиши керак
• Рақамли камера билан суратга олишда рангли гамут юқори бўлиши керак.

Услуб ва ёруғлик:

• фотосуратдаги ранг – нейтрал
• кўзлар очиқ ва кўринадиган бўлиши керак, улар сочлар билан қопланмаган бўлиши керак
• юз – қатъий тўлиқ юз, елкага қараб («портрет услуби») ёки бошни эгиб расмга тушиш ман этилади, юзнинг контурлари аниқ кўриниши керак
• фон бир хил, ёруғ
• тасвир пайтида ёруғлик бир хил, юзида сояларсиз, «қизил кўз» таъсирига йўл қўйилмайди

Кўзойнак ва бош кийимлар:

• кўзойнак билан суратга олишда кўзлар аниқ кўринадиган бўлиши керак, кўзойнакда сурат чироғи порламаслиги лозим. Қорайтирилган кўзойнак билан суратга олиш тақиқланади. Бундан ташқари, иложи борича, оғир массив рамкаларни енгилроқлари билан алмаштириш лозим.
• Кўзойнаклар кўзингизни қопламаслиги керак
• Суратга олишда бош кийим кийишга рухсат берилмайди, диний сабабларга кўра юзага келган ҳолатлар бундан мустасно, лекин бу ҳолатда ҳам юз пешонадан жағгача очиқ бўлиши керак, юзнинг контурлари аниқ кўриниши керак
• Суратга олинадиган одам расмда ёлғиз бўлиши керак (стулнинг суянчиғи, ўйинчоқлар ва бошқа фондаги одамларсиз). Юз ифодаси нейтрал, оғиз ёпиқ.

Расм ва талаб этилган бошқа маълумотлар тўлиқ юклангандан сўнг, кейинги босқичга ўтиб ўқувчининг қайси фандан ва қайси ҳудудда имтиҳон топшириши ҳақидаги маълумотлар тўлдирилади. Ариза бериш якунига етгач, тўлов қилинади.