Ўзбекистондаги Ислом цивилизацияси маркази “Иккинчи Ренессанс” экспозициясида Темурий шаҳзодаларнинг илм-фан, маданият ва санъатга қўшган ҳиссаси кенг ёритилади. Экспозициянинг муҳим жиҳатларидан бири Амир Темур ва унинг авлодлари ҳомийлигида яратилган ноёб қўлёзма асарларни тақдим этишдан иборат.

Жумладан, Темурий шаҳзода Пирмуҳаммад ташаббуси билан 1397-1398 йилларда кўчирилган икки жилдли қўлёзма катта тарихий аҳамиятга эга. Унинг биринчи қисми – машҳур шоир Абулқосим Фирдавсий қаламига мансуб “Шоҳнома” асари бўлиб, бугунги кунда Дублин шаҳридаги Честер Битти кутубхонасида сақланмоқда. Қўлёзманинг иккинчи жилдида XI-XV асрларга оид “Гаршаспнома”, “Шоҳаншоҳнома”, “Баҳманнома” ва “Қушнома” достонлари жой олган бўлиб, ушбу нодир асар Британия кутубхонасидан ўрин олган.

Ислом цивилизацияси маркази мазкур ноёб меросни ўрганиш ва кенг жамоатчиликка таништириш мақсадида ушбу қўлёзмаларнинг факсимиле нусхасини тайёрлашни режалаштирмоқда. Шунингдек, уларнинг электрон версиялари ҳам яратилган ҳолда марказ кутубхона фондига киритилиши кўзда тутилган.