Бухоро вилоятининг биратўла учта туманида “Илк ривожланиш маркази” фаолияти йўлга қўйилди. Ғиждувон, Вобкент ва Жондор туманларида очилган бу масканлар болаларнинг сифатли мактабгача таълимдан тенг фойдаланишини таъминлаш имконини беради.

— Хайрли иш эҳтиёжманд оилалар фарзандларини бепул мактабгача таълим билан қамраб олишда қўл келмоқда, — дейди вилоят мактабгача ва мактаб таълими бошқармаси масъул ходими Ирода Орипова. — Учала марказ икки миллиард сўмдан зиёд маблағ эвазига таъмирланди. Кичкинтойлар учун хавфсиз ўйин майдончалари барпо этилди. Синф хоналари ўқув-услубий жиҳозлар билан таъминланди. Айни дамда уларда жами 720 нафар бола қамраб олинган.

Алоҳида парваришга муҳтож кичкинтойлар ҳам эътибордан четда қолган эмас. Имконияти чекланган болалар учун уйга ташриф буюрган ҳолда таълим индивидуал тарзда ташкил этилмоқда. Мутахассислар фикрига қараганда, “Илк ривожланиш маркази” болажонларнинг ёшига мос билим бериш билан бир қаторда ўртадаги меҳр-оқибат ришталарини ҳам мустаҳкамлайди. Бундай марказлар фаолияти вилоятда босқичма-босқич йўлга қўйилмоқда.

Истам ИБРОҲИМОВ

«Халқ сўзи».