Франциянинг Париж шаҳрида ўтказилган нуфузли “IFTM Top Resa” халқаро туризм кўргазмасида Ўзбекистон Туризм қўмитаси раҳбарлигида Сурхондарё делегацияси ҳам иштирок этди.

Кўргазма доирасида вилоятга бағишланган махсус экспозиция ташкил қилинди. Унда Сурхондарёнинг қадимий меъморий ёдгорликлари, миллий урф-одатлари, ранг-баранг миллий либослари ҳамда замонавий туристик масканлари инновацион ёндашув асосида намойиш этилди.

Делегация аъзолари Франциянинг туризм соҳасидаги тажрибаси, хизматлар сифати ва инфратузилма имкониятлари билан яқиндан танишди. Шунингдек, Европа ва Франциянинг етакчи туроператорлари ҳамда йирик туристик компаниялари билан ўтказилган музокараларда ҳамкорлик истиқболлари муҳокама қилинди.

Ушбу учрашувлар давомида йирик халқаро блогерлар билан ҳамкорлик бўйича келишувларга эришилди. Улар умумий аудиторияси 100 миллиондан ортиқ обуначи, ахборот қамрови эса 300 миллиондан зиёд инсонларни ўз ичига олади. Бу ҳамкорлик Сурхондарёнинг бой туризм салоҳиятини жаҳон миқёсида кенг тарғиб қилиш учун катта имконият яратади.

Шунингдек, ҳар йили Франциядан вилоятга ташриф буюрувчи сайёҳлар сони ошиб бораётгани қайд этилди, бу эса минтақанинг туристик салоҳияти ўсишидан далолат беради.

Фарҳод ЭСОНОВ

«Халқ сўзи».