Ёшларда ҳарбий-ватанпарварлик туйғуларини янада мустаҳкамлаш, уларда ҳарбий касбга бўлган қизиқишларини янада ошириш, ёшларни ҳарбийлар ҳаёти билан яқиндан таништириш орқали ватанга муҳаббат ва садоқат руҳида тарбиялаш, яратилган шарт-шароитлар билан яқиндан таништириш мақсадида Фавқулодда вазиятлар вазирлиги Академиясида «Ҳарбийнинг бир куни» шиори остидаги маънавий-маърифий тадбир бўлиб ўтди.

Тадбирда пойтахтимизнинг А.П.Хлебушкина номидаги 22-сонли «Меҳрибонлик уйи»нинг тарбиячилари ва тарбияланувчилари, Фавқулодда вазиятлар вазирлиги Академияси фахрийлари, профессор-ўқитувчилари, ҳарбий хизматчилари, курсантлар, вазирлик матбуот хизмати ходимлари ҳамда оммавий ахборот воситалари вакиллари иштирок этди.

Тадбир давомида ёшлар Академия курсантларининг кундалик ҳарбий хизмат фаолиятини ҳис қилган ҳолда, реал кунлик ҳарбий хизматни ўташ тартиби асосидаги юқори савияда ташкил этилган сценарий бўйича эрта тонгдан то кечга қадар яқиндан танишдилар.

Тадбир аввалида Академиянинг кун тартибига мувофиқ, курсантларнинг эрталабки уйғон командасидан бошланадиган хизматга киришган бир гуруҳ ёш ҳаваскор ҳарбийлар, аввало ётоқхона ўрин жойларини тартибга келтириш ҳамда эрталабки бадантарбиядан бошлашди. Сўнгра ювиниш, эрталабки нонушта, саф тайёргарлиги жараёнлари уларни бу соҳага янада қизиқишларини уйғотди.

Шундан сўнг, махсус ўқув ҳарбий қурол-аслаҳалар ва куч воситалар, ёнғин ва қутқарув хизматида фойдаланиладиган техникалар, махсус асбоб-анжомларнинг кўргазмали намойишлари, курсантлар иштирокидаги ўқув минорасининг 4-қаватидан ўз-ўзини қутқариш ҳамда ишғол қилиш нарвони ёрдамида 4-қаватга кўтарилиш машқининг намойиши, курсантлар томонидан ёнғин ўчириш амалий спорти бўйича жанговар ёйилиш, махсус ёнғин-қутқарув автомобиллари орқали кўргазмали намойиши ҳамда курсантлар спорт турининг қўл жанги бўйича чиқишлари ёшларнинг ҳарбий соҳага ва қутқарувчилик касбига бўлган қизиқишларини янада ошишига сабаб бўлди.

Айниқса, мардлик, жасурлик, фидойилик ва матонат каби фазилатларни ўз ичига олган фильмлар намойиши, шунингдек, Академиянинг оркестр жамоаси томонидан ижро этилган жонажон Ватанимизни мадҳ этувчи куй қўшиқлар уларнинг истеъдодларини намоён қилишга ундади десак муболаға бўлмайди. Ёшларнинг ҳаваскор ижодкорлигини намоён этувчи куйланган тароналар барчанинг қалбида илиқ таасссуротлар қолдирди.

Тушликдан сўнг, турли тўгараклар мисолида ташкил этилган соҳага тааллуқли ва бадиий китоблар мутоааласи, дўстона спорт мусобақалари ҳамда ҳаваскор ижодкорларни ўз ичига олган қизиқарли машғулотлар уларни яна бир бор ҳарбий соҳага бўлган қизиқишларини оширишга хизмат қилди.

Тадбир якунида ташкилотчилар томонидан ёшларга Академия раҳбариятининг сертификатлари ва ташаккурномалари ҳамда эсдалик совҳалари тантанали топширилди.

— Бугунги кунда ёшларимизда ёт ғояларга қарши мафкуравий иммунитетни шакллантириш, Она-юрт тақдири учун масъулият туйғусини мустаҳкамлаш, уларни ўз касбига садоқатли ва ҳар томонлама етук кадрлар этиб тарбиялаш ҳар биримизнинг бурчимиздир, — дейди подполковник Тўлқин Ражабов. — Ёш авлод вакиллари билан ҳарбий-ватанпарварлик йўналишидаги тадбирларни тизимли олиб бориш мақсадида ташкил этилаётган тадбирлар замирида ёшларнинг ҳарбий соҳага бўлган иштиёқларини янада ошириш мужассамдир.

Фарҳоджон ХЎЖАЕВ,

ФВВ Академияси катта ўқитувчиси, майор.