Ижтимоий тармоқларда тарқалган видеоларда очликдан азият чеккан фаластинликларнинг БМТ омборига бостириб киргани акс этган. ҲАМАСнинг маълум қилишича, омборга кирган 5 киши отиб ўлдирилган. Маълумотларга кўра, гуруҳ БМТдан олинган маҳсулотларни аҳолига юқори нархларда сотишни режалаштирган.

Исроил қарийб икки ой давомида Ғазога гуманитар ёрдам киришини чеклаган эди. Фақатгина ўтган ҳафтадан бошлаб юклар қайта киритила бошланди. Энди ёрдам тарқатишни ҲАМАС эмас, АҚШнинг Gaza Humanitarian Foundation ташкилоти ходимлари амалга оширмоқда. Тарқатиш жараёни Исроил армияси ва америкалик хавфсизлик фирмалари томонидан қўриқланмоқда. БМТ бу жараёнда иштирок этмаяпти — Исроил ташкилотни ҲАМАС билан ҳамкорликда айблаган.

ҲАМАС ушбу ҳолатга жавобан фуқароларни ёрдам марказларини бойкот қилишга чақирди. «Халқимиз очликдан омон қолади, босқинчидан ёрдам сўрамайди», — дейилади гуруҳ баёнотида. Шунга қарамай, фаластинликлар озиқ-овқат олиш учун тарқатиш пунктларида тунда ҳам навбатда туришмоқда. Видеоларда айримлар АҚШ президенти Дональд Трампга миннатдорлик билдиргани ҳам кузатилган.

Мутахассислар фикрича, гуманитар ёрдам устидан назоратни йўқотиши ҲАМАС учун жиддий сиёсий ва молиявий йўқотишдир.