Иллюстратив фото

Европа Иттифоқи давлатларининг доимий вакиллари Россияга қарши санкцияларнинг 18-пакети бўйича келишиб олган. Бу ҳақда Европа Иттифоқининг ташқи ишлар ва хавфсизлик сиёсати бўйича олий вакили Кая Каллас маълум қилди.

“Биз санкцияларга яна 105 та соя флоти кемаларини қўшмоқдамиз ва Россия банкларининг молиялаштиришга киришини чеклаяпмиз. “Шимолий оқим”га тақиқ қўйилади”, — дейди у.

Бундан ташқари, Европа Иттифоқи “Роснефт”нинг Ҳиндистондаги энг йирик нефтни қайта ишлаш заводига биринчи марта чекловлар киритмоқда.

“Reuters” агентлигининг Калласга таяниб хабар беришича, янги пакет Россия нефти нархининг юқори чегарасини бир баррель учун тахминан 47,6 долларгача камайтиришни ҳам ўз ичига олади.

Энди ҳамжамият мамлакатлари санкцияларни вазирлар даражасида тасдиқлаши керак. Шундан сўнг улар кучга киради.

Аввалроқ, Словакия ва Венгрия Россия энергия ресурслари импортига тақиқнинг салбий оқибатларидан хавотирини билдирганди. Душанба куни Словакия Европа Иттифоқидан Россияга қарши янги санкцияларни қўллаб-қувватлаш эвазига энергия таъминоти учун таклиф қилинган кафолатлар лойиҳасини олган.

Кейинги пайтларда Европа Иттифоқи Россия энергия манбаларидан воз кечиш борасида фаол ҳаракатда. Хусусан, шу йилнинг май ойи бошида Еврокомиссия Россия энергия ресурсларидан бутунлай воз кечиш режасини эълон қилганди. Унга кўра, руслардан газ, нефть ва ядро ёқилғиси сотиб олиниши чекланмоқда. Йил охирига қадар эса Россиянинг янги газ шартномалари ва мавжуд операциялар бўйича импортни тақиқлашни жорий этиш таклиф этилган. Тақиқ узоқ муддатли шартномалар бўйича Россиядан импорт қилинадиган қувур гази ва суюлтирилган газ импортига ҳам таъсир қилиши мумкин. У 2027 йил охиридан кечиктирмай кучга кириши керак. Даъво қилинишича, бундай чоралар Европа Иттифоқига энергия етказиб бериш хавфсизлигини таъминлаш ҳамда нархлар ва бозорларга ҳар қандай таъсирни чеклашга мўлжалланган.

Кремль матбуот котиби Дмитрий Песковнинг айтишича, Европа Россиядан арзон энергия олишдан бош тортишга қарор қилиб, “ўз оёғини ўзи кесиб ташлади”.