Туркиянинг машҳур «Euronewsport» журналининг сентябрь ойи сонида Ўзбекистон Республикаси Давлат мустақиллигининг 29 йиллигига бағишланган мақола чоп этилди. Бу ҳақда «Дунё» АА хабар берди.

Нашр муаллифлари мамлакатимизнинг мустақиллик йилларида эришган ютуқлари ва амалга оширилган кенг кўламли ижтимоий-иқтисодий ва демократик ислоҳотларни юқори баҳолади.

Ўзбекистонда коронавирус пандемияси оқибатларига қарши кураш бўйича кўрилаётган қатъий чораларга алоҳида эътибор қаратилмоқда, COVID-19 тарқалиши оқибатида юзага келган глобал инқироз фонида ижтимоий-иқтисодий вазиятни меъёрлаштириш жараёнининг муваффақиятли ва изчил характери қайд этилди.

Материалда «Илм, маърифат ва рақамли иқтисодиётни ривожлантириш йили давлат дастури»нинг бажарилиши тўғрисидаги аниқ маълумотлар келтирилган. Қайд этилишича, 2017-2021 йилларга мўлжалланган Ҳаракатлар стратегиясини изчил амалга ошириш орқали Ўзбекистон тараққиётнинг янги босқичига қадам қўймоқда.

Шунингдек, нашр муаллифлари Ўзбекистон билан Туркия ўртасидаги икки ва кўп томонлама ҳамкорлик масалаларини батафсил таҳлил қилган. Ўзаро ҳамкорликнинг мисли кўрилмаган юқори даражаси, шу жумладан, Ўзбекистон – Туркия алоқаларининг стратегик шериклик босқичи, ҳамкорлик механизмларини шакллантириш ва самарали ишлашини таъминлаш борасидаги ишлар алоҳида қайд этилган.

Нашр муаллифлари, шунингдек, ўқувчилар эътиборини Ўзбекистоннинг Туркий тилли давлатлар ҳамкорлик кенгашидаги фаол иштироки, Хива шаҳрининг 2020 йилда «Турк дунёсининг маданий пойтахти» деб эълон қилиниши, Тошкентда Туркий дунё Ишбилармонлар кенгашининг йиллик йиғилиши кенг кўламли бизнес-форумлар билан биргаликда ўтказилишга қаратган.

Таъкидлаш жоиз, “Euronewsport” журнали Туркиянинг «AB Habercilik» медиа компанияси томонидан ҳар икки ойда бир марта нашр этилади. Нашр Туркия ва туркий дунё мамлакатлари жамоатчилиги ҳамда ишбилармон доиралари вакиллари орасида алоҳида обрўга эга.