«Уруш деярли тугади», — деди Трамп. Бу сўзлар ортида нима яширинган? BILDнинг АҚШдаги мухбири Герберт Бауэрнебел тушунтиради.

Эронда «Эпик ғазаб» операцияси бошланганидан 11 кун ўтгач Дональд Трамп CBS News телеканалига берган интервьюсида Эрон билан бўлаётган уруш деярли тугаганини айтди. Унинг сўзларига кўра, уруш кутилганидан анча олдинда. Ғалаба сифатида айтилаётган натижа ортида бир савол бор. Трамп нимага эришди?

Эрон ҳарбий-денгиз кучлари чўктирилди, ҳаво кучлари ишдан чиқди ва Оятуллоҳ Али Хоманаий вафот этди. Бу катта натижа, аксарият мутахассислар ўйлагандан кўра тезроқ эришилган буларга. Аммо асосий мақсадга, яъни режимнинг таслим бўлишига эришиб бўлмайди. Хоманаий ўрнига унинг ўғли келди ва отасидан кўра қаттиқроқ сиёсат юритиши мумкин энди.

Хавфсизлик бўйича эксперт, Нико Лангенинг таъкидлашича, сиёсий раҳбар йўқ қилинган бўлса-да Ислом Инқилоби Қўриқчилари Корпуси ҳали ҳам ўз ҳаракатларини амалга оширишга қодир.

Яна бир муаммо ҳал қилинган эмас. Эроннинг юқори даражада бойитилган уран захиралари топилмади. Расмий Теҳрон эгалик қилиши айтиладиган 400-460 килограммлик уран бир нечта атом бомбалари учун етарли ҳисобланади. Уларнинг устидан назорат ўрнатиш учун махсус бўлинмаларни юбориш имконияти муҳокама қилинган. Бироқ қуруқликдаги кучлардан фойдаланиш америкалик аскарлар орасида янги йўқотишларга олиб келиши мумкин. Бу эса Трампнинг мамлакат ичидаги заиф қўллаб-қувватлашига янада хавф туғдиради.

Нима учун Трамп урушдан чиқишни хоҳлайди?

Трампнинг урушни тугаши ҳақидаги сўзлари ички сиёсий сабабларга кўра айтилган. Кёлн университети профессори Томас Эагер айтадики, Трамп энди нефть ва бензиннинг юқори нархини пасайтиришга ҳаракат қилади. АҚШ президентининг баёнотларини бозорларга сигнал сифатида тушуниш керак. Бироқ нефть ва молия секторининг тинчланишига Оқ уйнинг оммавий сигналларидаги қарама-қаршиликлар тўсқинлик қилмоқда. Трампнинг айтишича, уруш деярли тугади, лекин у қўшимча ҳам қилди: биз ҳали етарлича ғалаба қозона олмадик!

Эрон билан уруш Америка Қўшма Штатлари тарихидаги энг машҳур бўлмаган урушлардан бири бўлиб қолмоқда: New York Times газетасига кўра, америкаликларнинг атиги 41 фоизи Яқин Шарқ операциясини қўллаб-қувватлайди. «Жамоатчилик бунга тайёрланмаган ва уруш учун аниқ асос йўқ», — дейди америкалик сиёсатшунос Скотт Эрб BILD билан суҳбатда. Эрбнинг сўзларига кўра, Трамп Эрон раҳбариятининг бошини олгандан сўнг тизим тезда бузилиб кетишига ишонган.

АҚШ президенти ўзи кутмаган қийинчиликларга дуч келган ва бу вазиятдан катта ички сиёсий йўқотишларсиз чиқиб кетишни хоҳлайди. Томас Эагер Трамп ўзининг чалкаш чиқишлари билан урушни тугатиш ёки давом эттириш учун очиқ эшик қолдирганини айтади.

Герберт Бауэрнебел ҳозирги вазиятдан келиб чиқиб хулоса қилади: уран йўқолган, аммо йўқ қилинмаган. Режимга зарба берилди, аммо мағлуб бўлмади. Трамп Эрон армиясини заифлаштирди, аммо уни бутунлай йўқ қилмади. Асосий савол шуки, бу уруш қандай тугайди?