Бухорода электр энергиясидан ноқонуний фойдаланган фуқаро ва Наманганда сифатсиз нефть маҳсулотини сотувга чиқарган АЁҚШ аниқланди. Бу ҳақда Электр энергияси, нефть маҳсулотлари ва газдан фойдаланишни назорат қилиш инспекцияси маълум қилди.

Қайд этилишича, инспекция Бухоро вилоят ҳудудий бошқармаси томонидан ўтказилган назорат тадбирида Ромитан туманида фуқаро А. З. га қарашли дала шийпонида ўрнатилган электр қурилмаларни ўзбошимчалик билан тармоққа улаб, электр энергиясидан ноқонуний фойдаланганлиги аниқланди.

Ушбу қоидабузарлик натижасида дастлабки ҳисоб-китобларга кўра электр таъминоти корхонасига 488 миллион сўмлик зарар етказилганлиги маълум бўлди.

Ҳозирда ҳуқуқни муҳофаза қилиш органлари томонидан терговга қадар текширув ишлари олиб борилмоқда.

Бошқа бир ҳолатда эса Ўзенергоинспекция Наманган вилоят ҳудудий бошқармаси томонидан ўтказилган назорат тадбирида «Т.Н.Б.» МЧЖга қарашли АЁҚШда сотилаётган АИ-92 маркали автобензиндан намуналар олиниб, лабораторияда таҳлил қилинганда давлат стандарт талабларига мос келмаслиги (сифатсиз) аниқланди.

Ушбу қоидабузарлик натижасида Ўзбекистон Республикасининг 940-сонли Қонунининг 43-моддасига асосан реализация қилинган товар қийматининг 50 фоизи миқдорида жами 244,6 миллион сўм миқдорида иқтисодий санкция қўлланилди.