Ўзбекистон Республикаси Президентининг «Экспортни қўллаб-қувватлаш чора-тадбирларининг Жаҳон савдо ташкилоти битимларига мувофиқлаштирилиши муносабати билан айрим ҳужжатларга ўзгартиришлар киритиш тўғрисида»ги фармони қабул қилинди. Фармонга кўра, экспортга оид молиялаштириш ва харажатларни компенсация қилишда бир қатор ўзгаришлар жорий этилди.

Фармонга мувофиқ, экспорт қилувчи ташкилотларнинг 2024 йил 31 декабрга қадар амалга оширган экспорти учун 2025 йил 1 февралгача субсидия ва компенсациялар тақдим этилади. Бунда автомобил, ҳаво ва темир йўл транспортидаги экспортга ташиш харажатларини компенсация қилиш амалиёти 2025 йилдан бошлаб бекор қилинади.

Экспортни молиялаштириш механизмлари такомиллаштирилиб, уни Жаҳон савдо ташкилоти талабларига мувофиқлаштириш мақсадида ислоҳотлар амалга оширилади. Бу ўзгаришлар халқаро савдо қоидаларига мослашиш ва экспорт салоҳиятини оширишга қаратилган.

Янги тартиблар 2025 йил 1 январдан кучга киради. Фармон экспорт соҳасидаги молиявий қўллаб-қувватлашни самарали ташкил этиш ҳамда миллий савдони халқаро стандартларга мувофиқлаштиришда муҳим қадам бўлади.

Ушбу ислоҳотлар орқали экспорт қилувчи ташкилотлар учун янги имкониятлар яратилиши, шу билан бирга, Жаҳон савдо ташкилоти талабларига жавоб берадиган мустаҳкам асос шаклланиши кутилмоқда.