Фото: Ҳасан Пайдоев("Халқ сўзи")

“Ўзбекозиқовқатхолдинг” компанияси таркибидаги “Coca-Cola Ichimligi Uzbekiston, Ltd.” компаниясининг мамлакатимиз салқин ичимликлар бозоридаги улуши 2019 йилда 25 фоиз, ширин газланган ичимликлар бозоридаги улуши 50 фоиздан юқори бўлди. Хусусан, компанияда салқин ичимликлар ишлаб чиқариш ҳажми 2018 йилда 38 фоизга, 2019 йилда 33 фоизга ошди. Бу ҳақда “Ўзбекозиқовқатхолдинг” компанияси Ахборот хизмати хабар берди.

Маълум қилинишича, ушбу ўсиш кўрсаткичлари “The Coca-Cola Company” компанияси томонидан дунё миқёсидаги энг юқори натижа сифатида эътироф этилди.

Компания 2019 йилда жаҳоннинг етакчи хорижий тадқиқотчи компанияси билан ҳамкорликда мамлакатимизнинг салқин ичимликлар бозорида ўрганишлар олиб борди. Унга кўра, келгуси 10 йилликда аҳоли сонининг ўсиши, даромадларнинг ошиши ҳамда ҳудудларнинг туристик салоҳияти кенгайиб бориши ҳисобига салқин ичимликлар сотиш бозори хажми 1,8 баробарга кўпайиши кутилмоқда.

"Шуларни инобатга олиб, компания 2020-2021 йилларда 31 миллион АҚШ доллар миқдорида инвестиция киритишни режалаштирган. Булар Хоразм вилояти ва Тошкент шаҳридаги заводлар модернизацияси, мавжуд қувватларни кўпайтиришни назарда тутади.

Мазкур лойиҳалар ҳудудларда аҳоли бандлиги даражасини оширишга, ишлаб чиқарилаётган кенг турдаги маҳсулотларни етказиб бериш бўйича логистика харажатларни иқтисод қилишга, мамлакатимизнинг жанубий ва ғарбий ҳудудлари аҳолисини салқин ичимликлар билан янада кенгроқ таъминлашга, ишлаб чиқариш заводлари жойлашган ҳудудларда солиқ тушумларини кўпайишига имкон яратади.

Шу каби истиқболли кўрсаткичлар, хусусан, мамлакатимизда инвестиция муҳитини яхшилаш, тўғридан-тўғри хорижий инвестицияларни рағбатлантириш борасида олиб борилаётган тизимли ишлар “The Coca-Cola Company”нинг Ўзбекистон бозорига қизиқишини янада кучайтирмоқда" дейилади хабарда.