Абдулазиз ЙЎЛДОШEВ/«Халқ сўзи». Бугунги кунда Тойлоқ туманида қорамолчиликка ихтисослашган 19 та фермер хўжаликларида жами 4675 бош қорамол парваришланмоқда. Мавжуд хўжаликларнинг 15 таси сут йўналишига, 4 таси гўшт йўналишига ихтисослашган.

Шунингдек, туманда учта паррандачилик фабрикаси, учта асаларичилик хўжалиги, 8 та балиқчилик хўжаликлари фаолият кўрсатиб келмоқда.

— Жорий йилнинг биринчи чорагида фермер хўжаликлари томонидан 4250 тонна гўшт, 2800 тонна сут, 5 миллион дона тухум етиштирилди, — дейди туман ветеринария ва чорвачиликни ривожлантириш бўлими бошлиғи Рустам Ҳайдаров. — Йил якунига қадар фермер хўжаликлари томонидан 26300 тонна гўшт, 12400 тонна сут, 20 миллион 200 дона тухум, 42 тонна балиқ, 20 тонна асал етиштириш режалаштирилган. Бунда туманимиздаги «Сиёб—Шавкат—Орзу», «Акмал Тошпўлатович», «Машҳура—Собира Голд» қорамолчилик фермер хўжаликларининг ўрни катта бўлмоқда.

Туманда чорвачилик ривожига қаратилган янги лойиҳалар ҳам амалга оширилмоқда. Жумладан, жорий йилда чорвачиликни кенгайтириш мақсадида учта қорамолчилик, 2 та паррандачилик, 1 та асаларичилик, 1 та балиқчилик лойиҳаларини амалга ошириш кўзда тутилган. Бугунги кунгача қорамолчилик бўйича 2 та лойиҳа, паррандачилик бўйича 2 та лойиҳа амалга оширилди.