Фото: Халқ сўзи

Лойиҳа қиймати 120 миллиард сўмга тенг бўлган ушбу шаҳарча Наманган-Чортоқ автомобиль йўлининг туман марказига киравериш қисмида барпо этилади. Боғ маҳалласи ҳудудидан жой оладиган мўъжаз шаҳарчадан дастлабки босқичда 7,9 ва 12 қаватли еттита турар жой биноси қурилади. 440 хонадондан иборат бу биноларнинг биринчи қавати савдо ва маиший хизмат кўрсатиш шохобчалари учун мўлжалланган. Қурилиш ишлари айни соҳада етарли тажрибага эга бўлган “Осиё” масъулияти чекланган жамияти томонидан амалга оширилмоқда.

– Чортоқда ҳозирга қадар 4-5 қаватли биноларгина қурилган, -дейди бош пудратчи жамоа иш юритувчиси Абдуолим Ботиров. – Боиси, туман тоғолди ҳудудга жойлашган бўлиб, сейсмик жиҳатдан фаол нуқталардан. Айни жиҳатини ҳисобга олиб, лойиҳага киритилган кўп қаватли биноларнинг сейсмик мустаҳкамлигига алоҳида эътибор қаратилди. Улар 7-8 балл даражадаги ер силкинишига бардош бера олади.

Шаҳарча учун ажратилган 1,8 гектар майдонда қурилиш ишлари бошланганига бир ойдан ошди. Ҳозирги кунда бу ерда етарли техника воситалари ва 50 дан ортиқ қурувчи томонидан пойдевор қўйиш юмушлари тезкорлик билан олиб борилмоқда. Бинокорлар лойиҳа ижросини келгуси йил охиригача ниҳоясига етказишни мўлжаллашган.

Бўлажак шаҳарчада болалар ва кексалар дам олиш майдонлари, автотураргоҳ, ер усти ўтиш йўлаги, хиёбон ҳамда бошқа инфратузилма иншоотлари барпо этилиб, аҳоли учун муносиб турмуш шароити яратилади. Унча узоқ бўлмаган жойда кичик саноат зонаси ҳам ишга туширилади.

Қудратилла НАЖМИДДИНОВ. “Халқ сўзи”.