Фото: «Халқ сўзи»

Чироқчи туманининг Тарағай қишлоғи ўзининг бой тарихи, бектакрор табиати, одамларининг турмуш-тарзи, урф-одат ва анъаналари билан машҳур. 

Пурвиқор Ҳисор тоғ тизмаси этакларида жойлашган қишлоқнинг бир томони Самарқанд вилояти билан чегарадош бўлса, бир ёни Китоб тумани билан туташган. Қишлоқ яқинида Сийпантош табиий ёдгорлиги, Амир Темур ғори ва яна бир қатор тарихий ёдгорликлар, диққатга сазовор манзилларнинг кўплиги эса унинг туристик жозибасини янада оширади.

Шундан келиб чиққан ҳолда Тарағайга “Туризм қишлоғи” мақоми берилган ва Президентимизнинг 2022 йил 27 январдаги “Хизматлар соҳасини ривожлантиришга оид қўшимча чора-тадбирлар тўғрисида”ги қарори билан тасдиқланган тегишли Йўл харитасига асосан, бу ерда ҳар йили “Тарағай баҳори” фестивалини ўтказиб бориш белгиланган эди. Шунга кўра, бу йил қишлоқда илк маротаба “Тарағай баҳори” фестивали ташкил этилди.

Очиқ осмон остида ўтказилган фестивалда Чироқчининг кўҳна тарихидан садо бергувчи миллий ҳунармандчилик маҳсулотлари, миллий таомлар кўргазмаси, миллий қадриятларни ўзида мужассам этган халқ ўйинлари барчани ўзига чорлади.

Таниқли санъаткорлар иштирокидаги галаконцерт эса тадбирга янада ўзгача шукуҳ бағишлади.

Жаҳонгир БОЙМУРОДОВ, “Халқ сўзи”