Ўзбекистон халқ шоираси Зулфияхоним таваллудининг 110 йиллиги муносабати билан “Бахтим шул – ўзбекнинг Зулфиясиман” ҳужжатли фильмининг намойиши бўлиб ўтди.

Бугун Ўзбекистон Миллий кино санъати саройида Ўзбекистон Республикаси Маданият вазирлиги ҳузуридаги Кинематография агентлиги “Ҳужжатли ва хроникал фильмлар киностудияси” ДУК томонидан Тошкент тиббиёт академияси билан ҳамкорликда “Халқ юраги” туркум доирасида суратга олинган “Бахтим шул – ўзбекнинг Зулфиясиман” ҳужжатли фильмининг намойиши бўлиб ўтди.

Намойишда Кинематография агентлиги вакиллари, талаба-ёшлар, киноижодкорлар ҳамда кино ихлосмандлари иштирок этишди. Мазкур фильмнинг режиссёри Наврўза Бийназова фильмнинг яратилиш мақсади ва аҳамияти ҳақида фикр билдирди.

Тадбир давомида мактаб ўқувчилари Зулфияхонимнинг шеърларини ифодали ўқиб, шоиранинг сермазмун ижодий меросига бўлган ҳурмат ва муҳаббатларини намойиш этишди.

Шунингдек, Кино саройга ташриф буюрган томошабинлар янги экспозициялар билан бойитилган Ўзбекистон Кино санъати музейи фаолияти билан яқиндан танишиб, миллий кино меросимизнинг бой ва ранг-баранг тарихидан баҳраманд бўлмоқдалар.