АҚШ ҳукумати яқин ойларда Гренландия устидан назорат ўрнатишга уриниши мумкин. Бу қадам ноябрь ойидаги оралиқ сайловларга ёки 4 июль куни нишонланадиган АҚШ мустақиллигининг 250 йиллигига тўғри келиши тахмин қилинмоқда. Бу ҳақда Politico хабар берди.

Евроосиё гуруҳининг Европа бўлими бошқарувчи директори Муджтаба Рахманнинг таъкидлашича, Вашингтоннинг бу борада қўллайдиган усуллари Венесуэлада амалга оширилган ҳаракатлардан фарқ қилади.

Эксперт фикрича, АҚШ ҳокимияти мавжуд мувозанатни ўзгартириш мақсадида сиёсий таъсир ўтказиш кампаниясидан фойдаланиши мумкин. Бу жараён маҳаллий сиёсатчиларни пора бериш орқали оғдириш, ҳарбий ва фуқаролик назоратини кучайтиришга қаратилган уринишларни ҳам ўз ичига олиши эҳтимолдан холи эмас.

Аввалроқ АҚШ раҳбари Дональд Трамп мамлакат миллий хавфсизлиги нуқтаи назаридан АҚШга Гренландия зарур эканини маълум қилган эди.

Шу билан бирга, Дания бош вазири Метте Фредериксен Гренландия Дания қироллиги таркибий қисми эканини таъкидлаб, АҚШни таҳдидлардан воз кечишга чақирди. Унинг қайд этишича, Вашингтон оролни ўз назоратига олишида ҳеч қандай маъно йўқ.