Фото: api.theins.ru

АҚШ президенти Жо Байден Россияга нисбатан янги санкцияларни эълон қилди.

Оқ уй раҳбарининг айтишича, АҚШ Россиянинг доллар, фунт ва иенада бизнес юритиш имкониятини чеклайди. Россиянинг энг йирик банкига қарши санкциялар киритилган, бу ВТБга ҳам тегишли. Қўшма Штатлар ва иттифоқчилар Россиянинг юқори технологияли маҳсулотлар импортини 50 фоизга чеклаш ниятида, G7 давлатлари ҳам Россиянинг юқори технологиялар соҳасидаги имкониятларини чеклашга келишиб олган. Россияга қарши янги санкциялар Россия космик дастурига ҳам таъсир қилади.

«Айнан Россия Европада хавфсизлик бўйича мулоқот ўтказиш таклифларини рад этган ва унинг Донбассдаги амалиёти асоссиздир. Қўшма Штатлар сўнгги ҳафталарда вазият шундай бўлишидан огоҳлантирган», дейди Жо Байден.

Шунингдек, Оқ уй раҳбарининг айтишича, унинг Владимир Путин билан музокара ўтказиш нияти йўқ ва АҚШ Украинадаги жангларда қатнашмайди. Лекин Германияга қўшимча АҚШ қўшинлари юборилади. Бундан ташқари, Россия ҳали SWIFT халқаро тўлов тизимидан узилмайди.

Сўнгги маълумотларга кўра, АҚШ Сбербанк, «Открытия», Совкомбанк, Газпромбанк ва Новикомбанкларига нисбатан ҳам санкция жорий этди.